Танымагъанларыгъызгъа ийнанмагъыз

Прохладнадан 63-жыллыкъ тиширыу полициягъа тарыгъып келгенди. Ол айтханыча, айны ичинде анга танымагъан адамла сёлешип, право низамны сакълаучу эм финанс  организацияланы къуллукъчулары болгъанларын айтхандыла. Сора  тиширыуну  ахчасын  ачыкъ этерге, аны банкдан алып, ала жиберген адамгъа берирге керекди, деп юйретгендиле. Ол а, сёлешгенлени айтханларына ийнанып, 9,7 миллион сомун бергенди. 

Полициячыла кюнню ичинде ахчаны алыргъа келген адамны тутхандыла. Ол Пятигорскдан 66-жыллыкъ тиширыуду. Тохташдырылгъаныча, ол кеси да хыйлачыланы «ыргъакъларына» тюшгенди. Анга да танымагъан адамла сёлешип, право низамны эм финанс организацияланы келечилери болгъанларын айтхандыла. Ол а  бузукъчулагъа 3,5 миллион сомун бергенди. Ахчасын артха къайтарыр ючюн, артмакъны алып, анга белгили этилген инсаннга берирге кереклисин айтхандыла. Алай бла тиширыу, кеси да сунмай, аманлыкъчылыкъгъа къатышханды. 

Бу шартла бла байламлы РФ-ни УК-сыны 159-чу статьясыны 4-чю кесегине кёре терслеу материалла ачылгъандыла. Аманлыкъгъа къатышханланы ачыкълау жумушла бардырыладыла. 

Ич ишле органланы къуллукъчулары республиканы жамауатына къоркъуусузлукъну жорукъларын энтта бир кере эсгертедиле. 

- Право низамны сакълаучу органланы, банкланы къуллукъчулары ахчаны ачыкъ этерге, аны сакълар ючюн «къоркъуусуз счётха» ашырыргъа керекди деп, бир заманда да сёлешмейдиле! Арт заманлада  уа хыйлачыла энчи аскер операциягъа къатышханланы бла аланы жууукъларын алдаргъа кюрешген кезиуле кёбейгендиле,- деп билдиргендиле бизге КъМР-де МВД-ны пресс-службасындан. 

 Полициячыла билдиргенлерича, хыйлачыла тюрлю-тюрлю телефон номерлени хайырланадыла, ала сёлешип, адамны онгун аладыла, къоркъутургъа кюрешедиле. Алай бла адамны жунчутуп, кеслерини айтханларын этдирирге излейдиле. 

- Сизге ишекли биреу сёлешсе, телефонну ёчюлтюп къояргъа керекди. Ушакъгъа къошулмагъыз, даулашмагъыз. Ишекли телефон номерден къайтарып сёлешмезча мадарла этигиз, -дегендиле ведомстводан эмда сакъ болургъа, танымагъан адамлагъа ийнанып къалмазгъа чакъыргъандыла.