Жангы мардалагъа келиширикди

КъМР-ни  Саулукъ сакълау министерствосундан билдиргенлерича, Прохладный шахарда «Узакъ ёмюр эм тири жашау бардырыу» миллет проектге кёре, район ара больницада сабий поликлиникагъа  тынгылы ремонт этиле турады. Эсге сала айтсакъ, эски мекям   1973 жылда сюелтилиннгенди. Андан бери анга тынгылы ремонт этилмегенди эм кеси да жангы излемлеге артыкъ  келишмегенди.

Жангыртыу ишледен сора  уллулугъу 2 минг квадрат метрге жетген медицина организация бюгюннгю мардалагъа келиширча боллукъду, ол санда «Аяулу поликлиника» амал бла ишлерикди.

Тынгылы ремонтну кезиуюнде башында къанжалларын,  терезелерин, эшиклерин,  инженер коммуникацияларын да алышырыкъдыла. Андан сора да, ич эм тыш къабыргъаларын да сюртюп, бояп, омакъ этерикдиле.

Бюгюнлюкде подряд организацияны келечилери корпусну башында эски  къанжалларын кетерип бошай турадыла.

Планнга кёре, объект 2028 жылдан кеч къалмай хайырланыргъа берилирге тийишлиди.