ОМС полис неге керекди?

Адам ауруса, хакъ тёлемей багъылыргъа эркинлиги барды—анга борчлу халда медицина страхованияны (ОМС) полиси керекди. КъМР-де МФЦ-да аны къайдан алыргъа боллугъуну эмда кесини юсюнден да не зат билирге кереклисин билдиргендиле.

ОМС полис адамны хакъсыз медицина болушлукъ алыргъа эркинлиги болгъанын туура этген документди. Алай а аны хар медицина организацияда бермейдиле, полисни жаланда ОМС системада ишлегенледе хайырланыргъа жарайды.

2022 жылны ахырына дери ОМС бла кюрешген страховой компанияла полислени къагъыт бланкда неда пластик картада бере эдиле. Энди уа аны жаланда электрон халда жарашдырыргъа болады: Госуслуги порталда, къырал жумушланы кёп функциялы араларында (МФЦ) неда сайлагъан страховой компанияда.

Электрон полисни къагъытха тюшюрюрге неда кесигизни смартфоннга кёчюрюп, керек болса, экрандан кёргюзтюп къояргъа боллукъду.

Эски къагъыт неда пластик полисле уа алгъынча ишлейдиле, аланы жангы тюрлюсюне алышындырыргъа борчлу тюйюлсюз.

Поликлиниканы регистратурасында сизге энчи бир организацияны сайлагъыз деп къысаргъа кюреше эселе,  эс бурмагъыз; страховой компанияны къайсысын сюйсегиз да сайларгъа эркинлигигиз барды.

ОМС полис Россей Федерацияны битеу тийресинде жюрюйдю, ол къайсы регионда берилсе да,  башхасы жокъду. Алай сиз жашагъан жеригизни алышхан эсегиз, бир айны ичинде аны юсюнден страховой компаниягъа билдирирге керекди. Тукъумугъузну неда атыгъызны тюрлендирсегиз да, алай этерге борчлусуз.

Юйню къагъытларын МФЦ-да жарашдырыргъа болады

Ахыр жыллада бизни республикада къурулуш бёлюм тири айнып барады. Жашау журтланы саны кёбейеди, аланы ёлчеми жюз минг квадрат метрле бла тергеледи, жууукъ беш жылны ичинде 761 минг квадратха жетдирирге мурат барды. Къурулушчула юйлени хайырланыугъа бергенде сатылмай жаланда талай фатар къалыучуду. Аны себепли  жашау журтланы сатыу-алыу келишимле эмда ала бла байламлы къагъыт жумушла кёпден-кёп бола барадыла.

КъМР-де МФЦ-да аны айтып, жеринден тепдирилмеген мюлкню къырал эсепге салыу жумушха сурам уллу болгъанын чертгендиле. Алай аны бла бирге сатыу-алыу келишимни да бу Арада этерге боллугъун а кёпле билмейдиле, дегендиле. Аны да МФЦ-гъа баргъан сагъатда женгил тындырыргъа боллугъун эсге салып, къагъыт жумушланы барын да бир жерде этерге чакъырадыла.

Пособие ишсиз тургъан хар кимге да берилип къалмайды

РФ-ни тийишли законодательствосунда айтылгъаннга кёре, ишсиз къалгъан неда аны излеп айланнган инсан адамланы иш бла жалчытыу арада эсепге турса, къыралдан пособие алыргъа эркинди. Алай ол хар кимге да берилип къалмайды, ол тизмеде ма бу къауумлагъа киргенледиле:

- 16 жыллары толмагъанла;

- стажы жетип неда абадан болуп пенсия алгъанла;

- тюрмеде олтургъанла эмда сюдню оноуу бла ишге жиберилгенле;

- урунуу келишим бла ишлегенле;

- келишим бла иш этгенле эмда абериле сатыучула;

- энчи предпринимательле, нотариусла, адвокатла, кеслери иш къурап къармашханла;

- аскер эмда башха тюрлю инсанлыкъ къуллукъ этгенле, 

- очно халда окъугъанла;

- эл мюлк предприятиялада болушлукъчу болуп уруннганла, элчи-фермер мюлклени, производстволу кооперативлени, артельлени келечилери.

Адам ишсиз болгъанын, анга кёре пособие аллыгъын иш бла жалчытхан ара тохташдырады. Ары заявленияны «Работа России» порталгъа кирип жиберирге боллукъду.