Гитче эмда орта предприятиялагъа себеплик

Быйыл МСП Корпорацияны энчи (онгдуруу) программасыны чеклеринде жарашдырыучу промышленностьда къармашхан гитче бизнесге учуз лизинг халда 660 миллиондан аслам сом берилгенди. Ахчаны машинала ишлеу, аш-азыкъ эмда химия промышленность бёлюмледен предприятияла алгъандыла. Жылны ахырына дери уа бизнесге ишлерин айнытыргъа 3,15 миллиард сом берилирге боллукъду, деп билдиргендиле КъМР-ни Экономиканы айнытыу министерствосундан.

«Шёндю кредитле эмда лизинг ахча багъа болгъанлары ючюн, гитче производстволагъа быллай халда себеплик этиу эм къыйматлы амалгъа саналады. Россейде чыгъарылгъан оборудованиягъа ставканы – 6, тыш къыралладан кетерилгенлеге уа  8 процент этгенбиз. Болушлукъ кеси да хар неге угъай, алчы бёлюмлеге, ол санда эм биринчиден жарашдырыучу производстволагъа бериледи. Быйыл жарым жюз чакълы компания 660 миллион сом къоллу болгъандыла. Аны хайырындан ала производстволу онгларын кючлендирирге, продукцияны жангы тюрлюлерин чыгъарып башларгъа, ол санда импортну алышыугъа эмда къыралыбыз технологияла жаны бла башхалагъа бойсунмазча этерге боллукъдула», -дегендиле сагъынылгъан Корпорацияда.

Этилген лизинг келишимлени орта ёлчеми 13,5 миллион сом болгъанды. Ахчаны асламысын (450 миллион сом) машинала ишлеучю эмда темирле жарашдырыучу бёлюмледе гитче предприятияла алгъандыла. Къалгъан кесегин а аш-азыкъ промышленностьда (96 миллион сом), бетон эмда андан къурулуш материалла чыгъарыуда (40 миллион сом), химия промышленностьда (29 миллион сом) биригиуле хайырланнгандыла.

Бу жаны бла алчы регионла быладыла: Ханты-Мансийск автоном округ (149 миллион сом), Санкт-Петербург (98), Москва (85), Челябинск область (58), Удмурт Республика (25). Саулай айтханда, быйылдан башлап, 2030 жылгъа дери гитче эмда орта бизнесге лизинг жаны бла эм азындан 16,5 миллиард сом берилликди.