Алмала бла наныкъла ёсдюрюуде алчыды

«Ахыр беш жылны ичинде Шимал- Кавказ федерал округда эл мюлк предприятиялада кёгет-жилек бахчаланы ёлчеми 20 процентге ёсюп, 43 минг гектаргъа жетгенди. Ол а саулай Россейде быллай жерлени арасында 23 процентни алады. Озгъан жылны эсеплерине кёре, округну эл мюлк биригиулери эмда элчилери жыйгъан кёгетлени бла наныкъланы ёлчеми ары дери болмагъанча аллай ёлчемге — 1 миллион тоннагъа жетгенди. 2021 жыл бла тенглешдиргенде, бу кёрюмдю 2,2 кереге ёсгенди.

Бёлюмню айнытыуда баш жерни Къабарты-Малкъар алгъанды; мында быллай продукция чыгъарыу 2,6 кереге ёсгенди, башхача айтханда, 284 минг тоннадан 746 минг тоннагъа дери.

Келир кезиуледе СКФО-да жангы бахчаланы орнатыу бла байламлы, 16 инвестиция проектни жашауда бардырыр умутла бардыла. Анга битеу да 38 миллиард сомдан артыкъ къоратыллыкъды. Бу шартланы КИФ-2026 форумну чеклеринде Россельхозбанкны Бёлюм экспертиза арасыны таматасы Малика Шаматова келтиргенди.

Бу арада белгилегенлерича, саулай Россейде бахчачылыкъны айнытыуда Къабарты-Малкъар алчы жерни тутады. Бизни регион бахчаларын 4,8 минг гектаргъа кенгертип (33 процентден асламгъа ёсюм), 19,1 минг гектаргъа жетдиргенди. Алай бла округну тийишли мюлклерини жерлерини кёп къалмай экиден бири КъМР-деди.