Башха-башха тюрсюнлю кёгетлени ашаргъа нек керекди?

 Диетологла айтханнга кёре, инсан саулугъун кючлерча, башха-башха тюрсюнлю кёгетлени харкюнлюк ашына къошаргъа керекди, ала хар бири да кеслерича файдалыдыла.

 Алай бла къызыл кёгетле, сёз ючюн, бадыражанла, къызыл болгар чибижи, жилекле - липокинлеге бюла С витаминнге байдыла. Ала жюрекге игидиле, къан тамырланы кючлейдиле, къартлыкъны болжалын арлакъ этедиле. Къызгъылдым кёгетледе – быхыда, хыярда, шапталлада – бета-каротин – А провитамин кёпдю, ол адамны терисине бла кёзлерине хайырлыды, аурууладан сакъланыргъа да болушады.

Сарыла – сары болгар чибижи, нартюх, ананас – кеслеринде лютеинни, зеаксантинни бла С витаминни кёп жыядыла, ала да иги кёрюрге, аурууладан терк къутулургъа болушадыла. Жашилледе – брокколи, шпинат, наша – болгъан хлорофилл, магний, К витамин бла фолиевая кислота къан тазаларына, чархыбызда ол кереклисича бир чыгъарына, органланы тазалаугъа, сюеклени кючлеуге, нерва системаны да тап ишлеуюне себеплик этедиле. Кёк эм кёксюлдюм кёгетле – эрикле, дугъумла, баклажанла – кючлю антиоксидантладыла. Ала, клеткаланы къартлыкъдан сакълагъанларындан  тышында, адамны эсин къаты этедиле, жюрек-тамыр системаны да бузукълукъсуз ишлеулерине хыйсап боладыла. Алай бла табакъда не кёп тюрлю кёгет болса, саулукъгъа ол къадар игиди.

Андан сора да, медикле ауузланнганда, татлы ашарыкъладан, печеньяладан эсе кёгетлени сайларгъа чакъырадыла. Ала да, тойдургъанларындан тышында, адамны чархын керекли витаминле эм микроэлементле бла байыкъландырадыла, чегилеге да тап ишлерге болушадыла. Витаминлери жетишген инсанны нерва системасы да ырахатлы халгъа келеди, ол къыйын болумлада жунчумайды, тюрлю-тюрлю аурууладан, инфекцияладан къорууланалады. Аланы,  андан сора да, бир ахшылыгъы – чархны ауурлулугъун мардада тутханларыды. Кёгетледен алыннган бал туз, татлы ашарыкъладача болмай, чархха акъырын-акъырын сингеди, алай бла ол ачлыкъ сынамай иги кесек заманны турады.