«Патриот» жыйырмажыллыгъын белгилегенди

Россейни халкъларыны бирлигини жылы

Бу кюнледе Нальчикни Искож районунда социал культура проектлени арасы «Миртде» сейирлик тюбешиу болгъанды. Ол Къабарты-Малкъарда «Патриот» регионал жамауат организация къуралгъанлы жыйырма жыллыгъына жораланнганды.

-Аллай бир заманны ичинде организация отуздан артыкъ магъаналы проектни жашаугъа сингдиргенди, жюзле бла тюрлю-тюрлю  тюбешиуле, ингирле къурап бардыргъанды, алагъа да хар тюрлю жыл санда болгъан  мингле бла адамла къатышхандыла. Аланы араларында – аскер-патриот  марафон «Махтау, Россей, Хорлам!», «Эсде тутабыз, хурмет этебиз»,  Россей Федерацияны къырал байрагъыны кюнюне жораланнган уллу акцияла эмда чыгъармачы тюбешиуле. Алагъа  энчи аскер операциягъа къатышып къайтхан ветеранла да къошулгъанларын чертирге тийишлиди. «Патриотну» проектлери РФ-ни Президентини грант фондуну саугъаларына да кёп кере тийишли да болгъанын чертирге керекди, -дегенди  байрамны ача, араны директору эмда КъМР-ни Башчысында дин- ниет жаны бла комиссияны къауумуна кирген - Юлия Ордокова.

Андан сора да,  ол залда олтургъанланы  «Патриотну» къурагъанла бла шагъырейлендиргенди. Ала:  философия илмуланы доктору, профессор КъМР-ни культурасыны сыйлы къуллукъчусу, КъМР-ни Къырал саугъасыны лауреаты Эфендиланы Фуад, КъМР-де эм фахмулу  звукорежиссер Сергей  Аренгольд, «Патриотну» правленини къауумуна кирген, КъМР-ни культурасыны сыйлы ишчиси, РФ-ни сыйлы насийхатчысы, фахмулу устаз Эльдар Дымовдула.

Жыйылгъанланы Россейни  халкъларыны бирлигини жылы бла  Эфендиланы Фуад, Эльдар Дымов да алгъышлай, былай дегендиле: «Быйылгъы жыл жарыкъ байрамла, аламат тюбешиуле бла бай боллукъду. Нек дегенде, ол биригиулюкню жылыды. Бириксек, бизни къолубуздан келмезлик зат да жокъду. Республикада кёп миллетлени келечилери жашайдыла. Аны алайлыгъын  бюгюн бу сахнада да  кёрюрге боллукъду. «Патриотну» арасына да кёп миллетлени  келечилери киргендиле. Биз барыбыз да биригип, ёсюп келген тёлюню патриот нитетлиликде, бир бирге тёзюмлю, хурметли болургъа кереклисине тюшюндюребиз. Барыбызгъа да бу къысха жашауда тынчлыкъдан, мамырлы кёкден сора не керекди. Ишлесег а, сюйген затыбызны табарыкъбыз. Биз биргебиз, мындан ары да биригип ишлерикбиз»,-деп, сахнада оруслула, малкъарлыла, къабартылыла, чюйютлюле, эбизеле, дагъыда башха миллетлени келечилери да бирден къолларын тутуп  сюелгендиле эмда Юлия Ордокова арада  Россейни халкъларыны  бирлигини  жылы алай бла башланнганын билдиргенди.

Андан сора концерт программа башланнганды. Аны кезиуюнде залда олтургъанланы  кёллерин Эльдар Дымов, жаш жуздузчукъла Милана Вологирова бла  Жана Дзасежева, халкъла аралы конкурсланы лауреатлары Айтекланы Мадина бла Алим Карданов, Рахайланы Алий, Елена Кошелева, Елизавета Кунижева  да ариу ауазлары бла  къууандыргъандыла.

«Кафа» деген сёзню малкъар тилге кёчюргенде, «тепсеу» дегенча  айтылады. Малкъарлыла –тюрк тилли халкъдыла, ала асламында республиканы тау жерлеринде жашайдыла. Тарыхха къарагъанда,  аланы атлары «таулуладыла» ол а  таулада жашагъанлары ючюндю. Бизни республиканы жеринде Европаны бек бийик тауу-экибашлы Эльбрус барды. Аны себепли  сизни бу ариу тепсеуге чакъырабыз деп, Вячеслав Кунижев, арагъа чыгъып, аламат тепсеую бла жыйылгъанланы кёллерин кётюргенди.

Ахырында уа артистле, «патриотчула» да,  бирге сахнагъа чыгъып, «Анам Россей», «Акъ терекни шыбырдауу» деген жырланы айтхандыла.