«Минг атлаууч» жангыртылгъанды

Кёп болмай Нальчикде «Туризм эм къонакъбайлыкъ» миллет проектге кёре, Шимал Кавказда эм эрттегили жаяу жолчукъну (терренкурну) жангыртып бошагъандыла. Аны игилендириу жаны бла иш элли жылны ичинде биринчи кере бардырылгъанды.   

Проектге кёре, терренкур бюгюннгю излемлеге келиширча болгъанды, аны бла бирге аны кийик табийгъат энчилиги да сакъланырча мадар этилгенди. Анда кёпюрню къангалары, атлауучла, солуу жерле да жангыртылгъандыла,  шинтикле, кёзню къаматмазча эм башха  тюрлю чырмамазча энчи  чыракъла  салгъандыла.  Жангы спорт майданны уа саулай тюбюне резин кюйюз жайгъандыла.  Мында алгъынча жараула этерге жарайды.

Дагъыда къошакъ халда воркаут майдан эм теннис столла да жарашдырылгъандыла. Шахарчыланы тилеклери бла фонтанчыкъ, аякъ жол къуралгъандыла. Андан сора да, тёгерек-башны жашиллендириуге да аслам эс бурулгъанды. Ол санда 4 минг юлкю бла 50-ден аслам терекчик орнатылгъандыла.

Бюгюнлюкде терренкур Нальчикни белгили эмда  ариу жерлеринден бирине саналады. Аны жангыртыу жаны бла проект,  регион конкурсда хорлап, 52 миллион сом чакълы бирге тийишли болгъанды. Аны КъМР-ни Курортла эмда туризм министерство бла Сбербанк бергендиле.

Аламат солуу жерни жангыртыргъа жерлешлерибизни санындан къуралгъан чыгъармачылыкъ къауум – архитекторла, дизайнерле эм маркетологла да – къатышхандыла. Ол санда Акъкъызланы Керим терренкурну жолларын жангыртханды, ала къоркъуусуз, аны бла бирге айбат болурча жууаплы жумушну тамамлагъанды. Скульптор эм къошунчу Мила Хацук да майданлада къызланы скульптураларын салып,  омакъ этгенди эм къууатлыкъ бергенди. Елена Романовская уа республиканы тарыхы эм маданияты бла байламлы композицияланы жазгъанды.   

- Къурулуш биригиуню келечилери, белгиленнген жумушладан таймай, хар нени биз сюйгенча этгенлерине бек ыразыбыз. Аны бла бирге социал сетьледе шахарчыла тамамланнган ишлени жаратханларын айтып, аслам жазадыла. Бери келгенлени да санына он кере къошулгъанды. Ол санда кече келгенле да аслам бардыла, - дейди шахарны айнытыу жаны бла «Платформа» институтну таматасы  Оксана Шухостанова.

-Табийгъатны сакълау эм шахар болумну игилендириу жерлешлерибиз  саулукълу эм насыплы жашау бардырырча ишни къураугъа  ахшы инвестицияды. Терренкур Нальчикни  адамла саулукъларын кючлеген, нёгерлери, ахлулары бла жараула бардыргъан, заманларын бирге ётдюрген жерди. Жамауат тири хайырланнган магъаналы объектни жангыртыргъа къошумчулукъ этгенибизге бек ыразыбыз.  Быллай башламчылыкъ регионну айнытыугъа, туризм жаны бла бютюн къыйматлы этиуге  ахшы къошумчулукъду, - дейди Сбербанкны республикада бёлюмюню таматасы Залина Бейтуганова. 

Эсге сала айтсакъ, Уллу Кизиловкада жаяу жолчукъ 1979 жылда ишленнгенди. Ол заманда Шимал Кавказда анга ушагъан объект болмагъанды. Жерлешлерибиз эм къонакъла да анга «Саулукъну жолу», «Минг атлаууч» дейдиле.  Кюн сайын аны спортчула эм саулукъларына уллу кёллю болмагъанла да жюзле бла жокълайдыла. Аны узунлугъу 2,6 километрге жетеди эм бийик жери уа 843 метрде орналады.