Окъуучуланы тири атламлары

Кёп болмай Къабарты-Малкъар къырал университетде  «Школ патент – тамблагъа атлам» деген VII халкъла аралы илму-билим бериу проектде хорлагъанланы саугъалагъандыла. Сагъынылгъан конкурс Евразиялы экономика союзну къыралларындан инженер эм илму  чыгъармачылыкъ жаны бла кюрешген хунерли сабийлени бирикдирген эм уллу майданладан бирине саналады. Быйыл анга Россейден, Белоруссиядан, Къыргъыздан эм башха къыралладан да 1666 заявка келгенди. Аланы  200-ден артыкъ специалист  тинтгендиле.   

Проект акъыл изленнген ишлени битеудуния организациясы (ВОИС) бла байламлыкъда Россейни Жарыкъландырыу министерствосу, Федерация Советни илму, билим бериу эмда маданият жаны бла комитети, Роспатент  болушуп бардырылады. Регионда уа ол КъМКъУ-ну технологиялагъа бла инновациялагъа болушлукъ тапдырыу арасыны башчылыгъы бла ётеди. Анга хакъсыз къатышыргъа жарайды, хорламгъа тийишлилени уа кёп къыйматлы амал сакълайды:  стажировка, патент алыргъа, вузгъа кирирге себеплик этиу эм стартап-инвестицияла. 

КъМКъУ-ну къыйматлы проектле жаны бла проректору Махийланы Танзиля,  къууанчлы жыйылыуну ача,  бюгюнлюкде технологияла болмагъанча терк тюрленнгенлерин, ол себепден ёсе келген тёлюле бу жаны бла дайым жетишимли болургъа итинселе иги боллугъун  белгилегенди. Аны бла бирге «Школ патент» эм къыйматлы проектлени жашауда бардырыргъа болушхан майданладан бири болгъанын да эсге салгъанды. «Быллай конкурслагъа къатышхан школчула, усталыкъларын, сынамларын ёсдюргенлеринден башха, жууаплы болургъа юйренедиле, жетишимлеге итинедиле», – дегенди Танзиля Тахировна.   

Эксперт советни (жюрини) башчысы, Сабий эм жаш тёлю чыгъармачылыкъ къаланы таматасы Аксана Карашева быллай башламчылыкъны ахшы амалладан бирине санагъанды. 

– Талай жыл мындан алгъа бизни университетибизде хунерли сабийлеге болушлукъгъа быллай проектни  жашауда бардырылып тебирегени бла  бек ёхтемленеме. Ол мектепледе бла къошакъ билим бериу учреждениялада педагогланы биригип, кёл салып ишлегенлерини хайырынданды. Мындан арысында да проект айный барырына ышанама эм анга къатышханлагъа жетишимле тежейме, – дегенди Аксана Карашева.

Ызы бла Монополиялагъа къажау службаны республикада бёлюмюню таматасы Анна Кумахова конкурс регионнга кадрла къурауда  стратегиялы магъаналы болгъанын белгилегенди.

– Конкурсну аты айтып турады ол кертиси бла да тамблагъы кюннге атлам болгъанын. Болсада жаш адамла, бир атлам бла чекленип къалмай, узакъ жолну къыдырыргъа хазырлыкълары да баямды. Бу магъаналы ишде экспертлени, юйретиучюлени эм башха специалистлени да къыйынлары уллуду. Быллай кезиуледе илмуну эм технологияланы да айнытырыкъ башчыла айырыкъладыла, – деп къошханды Анна Кумахова.

Ахырында фахмулу жашлагъа бла къызлагъа  эм аланы юйретген, проектлерине башчылыкъ этген устазлагъа  да дипломла бла саугъала берилгендиле. Къабарты-Малкъарны школчулары «Промышленный дизайн», «Илму-излем иш», «Чыгъармачылыкъ», «Сёзню устасы», «Тамбланы коду», «Ата журтну къоруулауда магъаналы»  эм «Акъыл бла берилген чексиз онгла» номинациялада биринчи жерлеге тийишли болгъандыла.