Къоркъуусузлукъгъа – баш магъана

Къабарты-Малкъарда «Жашау этерге инфраструктура» миллет пректге кёре иги кесек жолну жангыртыргъа онг табылгъанды. Ол санда аны чеклеринде бу кюнледе Эски Черек – Жемтала – Сукан-Суу жолну 5,3 километрине тынгылы ремонт этиле турады. Жолну кюн сайын жерлешлерибиз эм къонакъла да аслам хайырланадыла, деп билдиреди КъМР-ни Транспорт эмда жол мюлк министерствосуну пресс-службасы.

Бюгюнлюкде  жолгъа биринчи къат асфальт салып башлагъандыла. Аны бла бирге эки жанында да кенг тротуарла ишленедиле.  Къоркъуусузлукъну жалчытыугъа да аслам эс буруллукъду. Ол санда чыракълы чыпынла салынырыкъдыла, темир буруула тартыллыкъдыла,  жорукъланы билдирген белгиле бла ызла да жерлерин табарыкъдыла.  

Тынгылы ремонт ишлени кезиуюнде кёп заманнга жетерча жангы амалла бла материалла хайырланадыла. Объектни быйыл жайда бошар мурат этиледи.  

Аны бла бирге сагъынылгъан проектни чеклеринде Нальчик–Майский жолгъа да тынгылы ремонт этип бошай турадыла. Бусагъатда ишчиле аны ахыр кесегинде, Май район бла Чёрная Речка элни арасында 6,1 километр чакълы бирде, бордюрла салып, асфальт жайып, башха жумушланы да тамамлайдыла. Ахырында къоркъуусузлукъ жалчытынырча мадар этилликди.