Тиширыулагъа жоралап

Жууукъ заманда Къашхатауда «Юйюр» миллет проектге кирген «Аналыкъ бла сабийликни сакълау» федерал проектге кёре тиширыулагъа багъыу ара хайырланыргъа берилликди. Ол акушер-гинекология болушлукъну адамлагъа жашагъан жерлеринде тапдырыргъа ахшы себеплик этерикди, деп билдиргендиле КъМР-ни Саулукъ сакълау министерствосуну пресс-службасындан. 

Араны уллулугъу 513 квадрат метрге жетерикди. Мында тиширыулагъа амбулатор-поликлиника эм багъыу-профилактика жаны бла тийишли болушлукъ тапдырыллыкъды. Аны УЗИ бла кардиотокография (КТГ), процедурала этген кабинетлери эм юч адам жатарча кюндюз стационары да боллукъдула. Андан сора да, къыйын болумгъа тюшген аналагъа психология эм социал болушлукъ тапдырылырча мадар этилликди. Келир заманда ауурлукълары болгъан тиширыуланы аналыкъ этерге юйретген школ да ачыллыкъды. Саулай алып айтханда, мекямны къурамы саусузлагъа эм врачлагъа да тап болурча   излемлеге толусунлай келиширикди.

Бюгюнлюкде учрежденияда юч акушер-гинекология участок къуралгъанды, ала медицина ишчиле бла да жалчытылыннгандыла. Мында ауурлукълары болгъанладан тышында, абадан тиширыуладан башлап акъылбалыкъ болмагъан къызчыкълагъа дери ким да кесине къаратыргъа боллукъду. Алагъа профилактика, диагностика этилликди эм амбулатор халда багъылырча да онг тапдырыллыкъды.  

Эсге сала айтсакъ, модуль мекямланы къурулушларын бардырыуну юсюнден Къабарты-Малкъар къыралда биринчи болуп келишим этгенди. Аны хайыры бла элледе тиширыуланы саулукъларына тийишли халда эс бурургъа эмда демография болумну игилендирирге къолдан келликди. 

Планнга кёре жангы мекям бу айны ахырына хайырланыргъа берилирге керекди.