Льготалары болгъанлагъа хакъсыз жол

Къабарты-Малкъарда жашагъан инсанла, кеслери да льгота къауумлагъа киргенле,  санаторийге неда больницагъа барып келир ючюн жол хакъ тёлемезге боллукъдула. Россейни Социал фондуну республикада бёлюмюнден билдиргенлерине кёре, ол амал ма бу къауумлагъа киргенлеге бериледи:

- сакъат инсанлагъа эмда аллай сабийлеге;

- аскер къазауатланы эмда Уллу Ата журт урушну ветеранларына;

- радиация аварияладан заран кёрген гражданлагъа;

- дагъыда 1-чи къауумну сакъатлары  эмда аллай сакъатлыкълары болгъан сабийлени биргелерине баргъанла.

Бу амал къалай ишлейди? Россейни Социал фонду жолгъа электрон талонла жарашдырады – багъыу программаны кезиуюнде аланы поездде, автобусда неда самолётда хайырланыргъа боллукъду.

Озгъан жылда быллай онгну республикадан 1200-ден артыкъ адам хайырланнгандыла: ала битеу къыралда санаторийледе реабилитацияны ётерге неда саулукъларына къаратыргъа баргъандыла.

Талонну жарашдырыр ючюн, Социал фондну клиент службасына барыгъыз неда «Госуслуги» портал бла заявление беригиз. Бу жумушну алгъадан этерге керекди – жолгъа чыгъардан 2-3 ыйыкъ къалгъынчы дери.