Абызырамай, апчымай, болушлукъ этгенди

Кюн къарангы бет алыпды. Нальчикде Пушкин атлы орамда адамла жумушлары бла ёрге–энишге барадыла. Даниял да, репетитордан чыгъып, юйюне келе тура эди. Бир такъыйкъада аллында баргъан тиширыу, къайры эсе да ташайып, жокъ болуп къалады, ызы бла аны жилягъаны, болушлукъ тилеп къычыргъаны да эшитиледи. Жашчыкъ аны жаяу жолда башы ачыкъ болгъан терен уругъа кетгенин кёрюп, олсагъат МЧС-ге, терк болушлукъ берген станциягъа, шахар администрациягъа да сёлешип, болумну юсюнден билдиреди. Болушлукъ жетгинчи, тиширыуну къатындан кетмегенди: телефонуну чырагъы бла жарытып, аны бла сёлешип, жапсарыргъа кюрешип тургъанды.

Алайгъа кёп мычымай врачла, МЧС-де къуллукъ этгенле, полициячыла да жетедиле. Тиширыуну урудан чыгъарадыла, больницагъа алып кетедиле. Анга бир ненча операция этгендиле, энди жашаууна къоркъуу жокъду. Аны ёлюмден къутхаргъан а Атабийланы Хасанны жашы Даниял болгъанды.

- Уру ачылып, башына уа картон къагъыт салынып тура эди. Алайда терен тешик болгъанын киши да кёраллыкъ тюйюл эди. Тиширыуну аягъы аны юсюне басханлай, ол энишге ташайгъанды. Мен аны ол кюннге дери кёрген да этмегенме, артда билгенме аты Люся, тукъуму уа Къумукъладан болгъанын. Ол больницада эки ыйыкъдан сора атлап башлагъан эди. Бир кесекден аны жокъламай къоярыкъ тюйюлме,-дейди Даниял.

Жаш Нальчикде 2-чи номерли лицейни 11-чи классыны эм иги окъуучуларындан бириди. Школчуланы араларында бардырылгъан тюрлю-тюрлю битеуроссей эмда шимал-кавказ, республикалы олимпиадалагъа тири къатышады, хорламла, жетишимле да болдурады. Спортну тхэквондо тюрлюсюнден жараулагъа жюрюп турады. Мураты – Санкт-Петербургда экономиканы бийик школуну миллет университетине кирирге.

Даниялны атасы Хасан кёп жылланы судья болуп тургъанды, анасы Люба КъМКъУ-да тыш къыраллы студентлени орус тилден окъутады. Аланы айта келгеним, Хасан бла Люба аламат жаш ёсдюргенлери ючюн уллу махтаугъа тийишлидиле. 

КъМР-ни Жаш тёлю министерствосуну бёлюмюню таматасы Ратмир Каров Атабийланы Даниялгъа ыспас этип, Зумакъулланы Танзиляны назму жыйымдыгъын саугъа этгенди. «Биринчилени атламлары» битеуроссей биригиуню регион бёлюмюню башчысы Аслан Шипшев а жашны биреуню къыйынлыгъына уллу кёллюлюк этмей, болушургъа мычымай келгени ючюн атын айтып, махтау салады эмда аны саугъалаугъа тийишли кёргенди.