Сууну аяргъа, усталыкъ сайларгъа да эрттеден тюшюндюре

«РусГидро» компанияны Къабарты-Малкъарда бёлюмю жангы ишленнген Черек ГЭС-ни эшиклерин студентлеге бла школчулагъа биринчи кере ачханды. Станцияны къонакълары КъМКъАУ-ну «Электроэнергетика и электротехника» бёлюмюню бла «Кюн шахар» сабий академияны окъуучулары болгъандыла. Компания аланы ары чакъыргъаныны магъанасы – къонакъланы регионда энергетика объектле бла шагъырейлендириудю эмда алагъа усталыкъ сайларгъа себеплик этиудю, деп билдиргендиле аны регионда бёлюмюнден.

Экскурсияны кезиуюнде жаш адамла станцияны машинала орналгъан залында болгъандыла. Анда специалистле алагъа гидроагрегатла къалай ишлегенлерини, бу объектге саулай къалай къаралгъаныны юсюнден кёп хапар айтхандыла. Студентле бла школчула да сорууларын кем этмегендиле эмда сейир къозгъагъан затланы юсюнден толуракъ ангылау алгъандыла. Саркъып келген сууну кючю энергиягъа къалай бурулгъанын да кеслери кёзлери бла кёргендиле.

«Черек ГЭС бизни эм жангы станциябызды. Ол былтыр жайда ишлеп башлагъанды. Бу уа мында биринчи экскурсияды. Къонакъларыбыз инженер усталыкъны жаратхан школчула эмда келир кезиуледе энергетикада ишлерикле болгъанлары бютюнда къууандыргъанды. Быллай тюбешиуле терк-терк бардырыла турсала сюерик эдик. Нек дегенде жаш адамла энергетика технологиялагъа сейирлери уллу болгъаны кёрюнеди. Бизни борчубуз а – алагъа гидроэнергетиканы юсюнден хар нени да тынгылы ангылатыргъады, гидроэнергетика – шёндюгю, магъаналы бёлюм болгъанына тюшюндюрюудю», – дегенди «РусГидро»-ну Къабарты-Малкъарда бёлюмюню келечиси Боташланы Ислам.

Аграр вузну предприятияланы энергия бла жалчытыу кафедрасыны устазы Амур Фиапшев да экскурсия студентлени ала окъугъан усталыкъны энчиликлери бла иги шагъырейлендиргенин чертгенди. «Ала оборудованияны кеслери кёрселе, инженерле бла ушакъ этселе, энергетиканы керти кючюн сезселе – ол къайсы лекциядан эсе да бегирек кёллендиреди. Быллай жолоучулукъладан сора жаш адамла окъуугъа башха кёзден къарап башлайдыла, эслирек боладыла, бу уллу бёлюмге талай замандан ала кеслери да къошулургъа боллукъларын ангылайдыла», – дегенди ол.

«Кюн шахар» академия уа энергетика компанияны усталыкъ сайлау жумушланы тамамлауда эрттеден бери нёгериди. Ала экиси да билим бериу проектле бла кюрешедиле, тематика дерсле эмда экскурсияла бардырадыла, аны бла сабийлеге ким болургъа сюйгенлерине тюшюнюрге болушадыла.

Академияны устазы Элдар Суйдимов аны барын да былай чертгенди: «Сабийлеге станция бек сейир кёрюннгенди. Ала энергия къалай чыгъарылгъанына, энергетикле къалай ишлегенлерине уллу эс буруп къарагъандыла. Аны барын да кеслери кёзлери бла кёргенлери, бу усталыкъны магъаналыгъына тюшюннгенлери бек игиди. Бизни бла байламлыкъ жюрютгенлери ючюн РусГидрогъа ыразыбыз».

Компания профориентация ишге не заманда да уллу эс бурады. Регионда станциялада студентлеге бла школчулагъа экскурсияла бардырыладыла, ала бла тюбешиуледе инженер усталыкъны, саулай энергетиканы юсюнден да кёп магъаналы хапарла айтыладыла.