Жангы излемлеге келишген мекям ишленирикди

Къысха заманда  Кёнделенде искусстволаны жангы школу ачыллыкъды. 25  мартда маданиятны ишчилерин кюню белгиленеди. Бу байрам 2007 жылда В.В.Путинни указы бла тохташдырылгъанды. Ол  адетлерибизни бла тёрелерибизни сакълагъанланы барысын да бирикдиреди: музейни, китапхананы, элледеги маданият юйлени ишчилерин эм чыгъармачылыкъ мектеплени устазларын да.

Ол кюн «Единая Россия» партияны депутаты Атмырзаланы Марат элни искусствола школуну таматасы Атмырзаланы Танзиля бла бирге Кёнделенде жангы ишленирик искусстволаны  школуну планын сюзгендиле. Аны ишленир жерин кёп кенгешип сайлагъанларындан сора, ишленирик мекямны дизайн-проектин да тинтгендиле.

- Узакъ элледе маданиятны айныууна тутхучлукъ этиу «Гитче туугъан журтуму маданияты» деген проектни толтуруу  «Единая Россия» партияны баш борчларындан бириди. Кёнделенде ишленирик жангы искусстволаны школу сабийлени фахмуларын ачыкълагъан эм аланы тюз жаны бла айнытхан, заманны шёндюгюлю излемлерине келишген мектеп боллукъду,-дегенди Атмырзаланы Марат.

 Объект «Юйюр»  миллет проектни эм «Маданиятны айнытыу» къырал программаны чеклеринде ишленирикди. Анда уллу окъутуу отоула, актовый залы, музыкалы кабинетле бла студияла ишленирикдиле. Андан сора да, бу проект  саулукъларында чекленнген онглары болгъан сабийлени окъутууну амалларына кёре да жашаугъа келтирилликди. Бир жолгъа мында 45 сабий билим алаллыкъды. Ол а  элни жаш тёлюсюню аслам кесегин къошакъ билим бериу бла жалчытыллыгъына шагъатлыкъ этеди.