Толу жашаугъа къайтыргъа сюйгенлеге болушургъа хазырдыла

Россейни Саулукъ сакълау министерствосу жукъгъан аурууланы профилактикасыны ыйыгъын баРдырады. Аны чеклеринде КъМР-ни Психиатрияны бла наркологияны республикалы клиника арасы  билирге керекли жорукъланы эсигизге салады. 

  - Бизни араны врачлары хар кюн да ичгичиликден, наркоманиядан ауругъанлагъа тюбейдиле. Ол себепден адамны эсиртген ичгиле, тютюн, наркотикле дегенча уула адамны жашаууна къоркъуулу жукъгъан аурууланы  «кёпюрю» болгъанларын ишексиз айталлыкъбыз,-дегендиле бизге клиниканы пресс-службасындан.

 Ичги, наркотикле адамны башын хайран этедиле, алай бла уа ол саулугъуну, жашаууну юсюнден сагъыш этмейди, ууну энтта къайда табайым деген къайгъыдан башха аны жарсытмайды. 

Алай, врачла айтханларыча, наркоманлагъа ВИЧ,   гепатит В башхаладан терк жугъадыла:  ала бир шприц бла хайырланнганлары ючюн. Дагъыда аракъыда, наркотикледе болгъан уулу затла адамны бауурун бузадыла.  Алай бла ол гепатит В ауруугъа къажау туралмайды.

Тютюнде болгъан уулу затла уа ёпкени бузадыла. Алай бла къарыусуз халгъа жетген ёпке туберкулёзну бактерияларына ачыкъ болады. Тарихлеге кёре, тютюн  тартханланы арасында туберкулёз жукъгъанла башхаладан асламдыла.

Аракъы адамны битеу санларына заран салады, ичгичини иммунитети къарыусуз болады.  Санла жукъгъан ауруулагъа къажау ишлеялмайдыла. Алай бла уа ичгичилени арасында туберкулёз къыйыннга айланады, аны багъар онг болмай къалады.

- Жукъгъан ауруулагъа къажау ыйыкъ жашауунга жангы кёзден къараргъа, манга болушлукъ керекди деп, кесинге болушургъа тийишли заманды. Бизни клиниканы врачлары саулукълу жашаугъа къайтыргъа сюйгенлеге болушургъа хазырдыла,-дегендиле бизге клиникадан.