Шуёхлукъну багъалау

Малкъар халкъны жангырыууну кюнюне

Бу кюнледе Алтай Республиканы «Горно-Алтайск шахарында А.В.Анохин атлы Миллет музеиде Къулийланы Къайсынны бек уллу шуёху,  Россей Федерацияны культурасыны сыйлы ишчиси, поэт эмда  жазыучу , студент жылларындан бери да СССР-ни жазыучуларыны союзуну къауумуна кирген Алтайны культурасыны сыйлы къуллукъчусу  Борис Укачинович Укачинни 90 жыллыгъы бла байламлы  кёрмюч ачылгъанды.

Борис Укачин Къайсын бла кёп кере тюбешип, бир бирге къонакъбайлыкъ да этип тургъандыла. Кёрмючде  алтайлы поэтни кёп башха белгили жазыучула, поэтле бла да суратлары бардыла. Аланы араларында аслам жерни Къулийланы Къайсын бла тюшген суратла аладыла.

Укачинни аты  алтайлы  адабиятда энчи жерни алады. Аны чыгъармачылыгъы туугъан жерини табийгъатыны ариулугъун, маданиятын, алтай халкъны ниет байлыгъын кёргюзтеди. Аны назмулары дунияны кёп тиллерине кёчюрюлгендиле, ол санда малкъар тилге да. Аны бла бирге Борис Укачинович бизни айтхылыкъ жерлешибиз Къулийланы Къайсынны иги кесек  назмуларын алтай тилге да кёчюргенди.

Музейге келгенлени кёрмючню юсюнден поэтни жашы Алтайны сыйлы художниги Амыр Укачин кёп сейирлик хапарлары бла шагъырейлендиргенди. Дагъыда  ол атасы Чингиз Айтматов, Къулийланы Къайсын, Расул Гамзатов эмда  башха поэтле бла къаллай шуёхла болгъанларыны, аланы иги кесеги юйлерине  келип, атасы бла бирге олтургъанларыны, кёп сагъатла бла ушакъла бардыргъанларыны юсюнден эсгериулерин да айтханды.