Ананы саулугъу - балагъа уллу саугъады

Сабий тууса, алгъыш этгенде «керексиз, саулукълу бала болсун» дейдиле. Эрттегилиле алгъыш этгенде ол сёзлени бошдан айтмагъандыла. Саулукълу, бир тюрлю кереги болмай туугъан бала уа къайсы юйюрге да уллу насыпды. Болсада, жарсыугъа, бир-бирледе жашау болумла кеслерини ишлерин этерден бир жанында къалмайдыла. Бюгюн аллай бир «саугъаны» къызаргъан аурууну (краснуха) юсюнден айтайыкъ. Былай къарагъанда ол бош, сабий жукъгъан арууду, дерге боллукъду. Аны бла балачыкъла къагъанакъ заманларында ауруп къутуладыла. Жарсыугъа, алай тюйюлдю. Энди тууарыкъ сабийни саулугъуна ол бек уллу хата салады. Аны себепли ана боллукъ тиширыугъа врачла къызаргъан ауруугъа къажау къайгъы этерге кереклисини юсюнден таукел айтадыла.

Аны бла байламлы тиширыулагъа къарагъан врач-акушер КъМР-де Перинатал арада физиология бёлюмню заведующиси, КъМР-ни Саулукъ сакълау министерствосуну штатда болмагъан баш специалисти Лолита Темботова бла  ушакъ этгенбиз.

 -Лолита Башировна, халкъда къызаргъан ауруугъа артыкъ уллу магъана бермейдиле, ол угъай да андан къоркъмайдыла. Сабийден ауурлугъу болгъан тиширыугъа ол не хата этерикди, аны ючюн  дарман салыргъа неге керекди?

-Бек биринчи, къызыл аруу ол жукъгъан аурууду, кеси да «Рубелла вирус» вирусдан къуралады. Ол адамгъа женгил тиеди, сабийни юсюне къызыл тамгъала чыгъадыла, температурасы кётюрюледи, безлери кёбедиле. Тиширыуну баласы къарынына тюшген биринчи юч айда анга къызыл аруу тийсе, артда ол бек  уллу палахла келтирирге боллукъду. Ала сабийни кёзлери кёрмезге, жюреги, къан тамырлары ауруп къыйнаргъа, къулагъы эшитмезге, акъылы тап ишлемезге къоркъуудула. Ол угъай да, бала анасыны къарынында ёлирге да боллукъду.

 Анна кеси ол аруудан женгил ауруп къутулса да, артда сабийни бек къыйнаргъа боллукъду.

-Ол тюрлю болумдан къутулууну амалы бармыды? Иммунитетибизними тинтебиз!

-Белгилисича, кюнден-кюннге медицина алгъа тынгылы атлам эте барады. Аллай затладан къутулур онгу да барды, ол а дарман салыуду. Иммунитетинг болгъанын бла къалгъанын билир ючюн, энчи тинтиуню ётерге тийишлиди. Чархынгда иммунитет алаша, неда ол жокъну орунунда эсе,  ол алгъын къызгъыл аурууну инфекциясы бла тюбешмегенди неда ауруп къутулгъан замандан бери кёп жыл озгъанды, алай бла эртте этилген вакцинаны кючю тас болгъанды.

Дагъыда эсде тутаргъа тийишлиди, антителаларынг болгъанларын бла къалгъанларын тинтиуню, ана сабийи къарынына тюшгюнчю бир ненча ай алгъа ётерге керекди. Ол тийишли дарманны заманында салыргъа эмда ананы, баланы да кёп палахладан къутултургъа боллукъду.

-Сора дарман салыу а бекми керекди?

-Анализле къызыл ауруудан къорууланыу болмагъанын кёргюзтдюле эселе, тиширыу прививканы этдирирге борчлуду. Шёндюгю вакцинала бек хайырлыдыла, адамны чархына хатасы тиймейди. Дарманны салдыргъандан сора, юч айны ичинде ол кесини ишин тынгылы толтурурча, бала ол заманны ичинде  ананы къарынына тюшмезча мадарла этерге керекди. 

-Сабий къарынында болса уа дарманны салыргъа нек жарамайды?

-Белгилисича, вирусла ала аурууну женгил тюрлюсюн тийдиредиле, алай эсе уа, аны ананы къарынына тюшген балагъа хата келтирирге боллукъ уллу къоркъуу барды. Аны себепли дарманны алгъадан салыргъа керекди.

Энди тууарыкъ сабийини юсюнден къайгъырыуну, ол дуния жарыгъын кёргюнчю иги да алгъа башланыргъа керекди. Заманында саулукъну тинтдириу, анагъа, балагъа да хайырлыды. Эсигизде болсун- саулугъугъузгъа къайгъырыу, энди тууарыкъ балагъызгъа уллу саугъады.