Хайырлы тюбешиу

Къабарты-Малкъаргъа ишчи жумуш бла келген Россейни Жигити, «Юнармия» къымылдауну Баш штабыны начальниги Владислав Головин бла «Биринчилени къымылдаууну» председателини экинчиси Ксения Янова КъМКъУ-ну студентлери бла тюбешгендиле.

Окъуу юйню къонакъларыны санында Къабарты-Малкъарны жаш тёлюню ишлерини министри Азамат Люев бла «Биринчилени къымылдаууну» регион бёлюмюню советини председатели Аслан Шипшев бар эдиле. Анда бийик билим берген окъуу юйню студент биригиулерини, ол санда университетни «Биринчилени къымылдаууну» тёбен бёлюмюню келечилери келгендиле.

«Бийик билим берген юйледе къымылдауну тёбен бёлюмлерин къураугъа биз энчи магъана беребиз. Ууакъ эм абадан сабийлени ызыгъыздан тизерикле сизсиз. «Биринчилени къымылдаууну» ахшы ниетлерин жаш тёлюге ангылаталлыгъыгъызгъа мен ишексизме», – дегенди жыйылгъанланы алларында Ксения Янова.

2022 жылда Мариуполь ючюн сермешледе ауур жаралы болуп, аягъын тас этген, бюгюнлюкде Рязаньны десант училищесинде окъутхан, Россейни жигити Владислав Головин да сёлешгенди.

«Жаш тёлю бла бирге болуп, аны эшитирге, ангыларгъа керекбиз. Баргъан жолугъузда арсарлы болмагъыз. Хар ишде да алда болургъа итинигиз», – дегенди ол.

«Студентле бла ачыкъ ушакъ баргъанды. «Биринчилени» ишлерине къатышханланы келир жашауларында жетишимле болдурургъа онглары барды», – деп къошханды Ксения Янова.