Табийгъатны аяргъа юйретген оюн

Бизни къыралда жыл сайын онбиринчи январьда заповедниклени эмда миллет паркланы Кюню белгиленеди. Ол экология орузлама башланнганыны белгисиди, кеси да табийгъатха эс бурургъа чакъырады.

Бу байрамгъа атап, битеу къырал аманат жерле эмда миллет паркла тюрлю-тюрлю жумушла къурайдыла. Аланы кезиулеринде адамлагъа тёгерекдеги къудуретге аяулу кёзден къараргъа кереклисин эсгередиле. Аллай башламчылыкъладан бири - «Заповедный квиз» деген оюнду.

Анга къатышханла заповедниклени, жаныуарланы эмда битимлени юслеринден сорууланы тинтиуге тюшюнедиле. Дагъыда Россейни аламат экосистемалары бла шагъырейленедиле. Бу оюн адамгъа кесини экология жаны бла билимин ачыкъларгъа болушады, табийгъатны юсюнден ангылауун да байыкъландырады.

Къабарты-Малкъарны къырал заповедниги экология жарыкъландырыугъа тири къатышыргъа жаш тёлюню да чакъырады. Бу учрежденияны тийишли бёлюмюню келечилери «Заповедный квиз» оюнну бардырыугъа бек сюйюп къошулуп, аны Булунгуну, Огъары Малкъарны эмда Бызынгыны орта школларында ётдюргендиле.

«Сабийле «Россейни заповедный системасы», «Жаныуарла», «Табийгъат», «Наследие» темалагъа жораланнган не къыйын соруугъа да жууапларын кёл салып бере эдиле. Школчуланы кёбюсюне кийик табийгъатны юсюнден кеслери билмеген шартла бла шагъырейлениу бек аламат сынам болгъанды. Бирлери уа табийгъатны къоруулауну юсюнден бютюнда терен билирге сюйгенлерин билдирген эдиле», - дегенди заповедникни экология жарыкъландырыу эмда шагъырейлениу туризм бёлюмюню таматасы Тогъузаланы Лейла.

Оюннга тири къатышханланы барын да дипломла бла белгилегендиле. Аны бардырыргъа болушханлагъа заповедникни башчылары ыразылыкъларын билдиредиле: Булунгуну школунда биологиядан устазны – Аппайланы Маринаны, Огъары Малкъарны 2-чи номерли мектебинде географиядан окъутхан Хульчаланы Фатиманы, Бызынгыны школуну башчысыны окъутуу-юйретиу жаны бла орунбасарын – Ботталаны Мадинаны.