Сабийлени кеслерин къоя турмагъыз

От тюшюу хар заманда да уллу къоркъуу салгъан, бушуугъа да келтирген болумду. Жарсыугъа, аллай кезиуледе сабийле да ачыйдыла, ёлгенле да бардыла. Аны бла байламлы МЧС-ни жер-жерли бёлюмю республиканы жамауатын гитче сабийлени юйде кеслери алларына, беш минутха окъуна чыгъа эсегиз да, бир заманда да къоймазгъа чакъырады.

Чыгъаргъа тюшген эсе, эшиклени ала ачалырча жабыгъыз. Сирнеклени, от къабындыргъан затланы, дарманланы, химиялы тазалау кереклени гитчеле жетер жерледе къоймагъыз. Сабийге кеси аллына газ неда электрикалы печьлени жандырыргъа эркин этмегиз, от тюшюуден сакълагъан жорукъланы, от тюшгенде ол кесин къалай жюрютюрге кереклисин ангылашынырча женгил тилде айтыгъыз. От тюшгенде, шкафлагъа, ундурукъ тюплеге бугъунургъа жарамагъанын дайым эсгертгенлей туругъуз. 

Балаланы къоркъуусузлукълары, эм алгъа, аланы ата-аналарыны къолларындады. Хар сабий да жашагъан жерин билирге керекди. Эринмей, гитчелеге болушлукъ этген службаланы телефонларын кёлден билдиригиз. Сакълыкъ артда уллу палахдан сакъланыргъа болушур.