Юйюрлеге болушуугъа – баш магъана

Къабарты-Малкъарны Жамауат палатасыны комиссиялары ишлерин башлагъандыла. Бу кюнледе биринчи жыйылыуун Социал политика, саулукъ сакълау, физкультура эм спорт жаны бла комиссия бардыргъанды.
Аны башчысы Наталья Шинкарёва белгилегенича, ала ишлеринде къыралны Президенти Владимир Путинни башламчылыгъы бла жарашдырылгъан миллет проектлени толтурууну эсепде тутуу эмда толтуруучу власть органлагъа аланы тамамларгъа себеплик этиу энчи жерни  аллыкъды.

Палатаны башчысыны орунбасары Людмила Федченко уа «Юйюр» миллет проект къалай бардырылгъанына бла республиканы Саулукъ сакълау министерствосуну Перинатал арасында аналагъа бла къагъанакълагъа тынгылы медицина болушлукъ этиу жаны бла болумгъа къараргъа чакъыргъанды. «Миллет проектде салыннган борчланы толтуруу юйюрлеге не жаны бла да болушлукъ этиу деген магъананы тутады. Анга кёре Перинатал арада юйюрге сабийли болургъа умут этген кезиуюнден башлап  бала туугъунчугъа дери къайгъырыргъа керекдиле», - деп къошханды Людмила Борисовна. Бу оюмну комиссияны келечилери палатаны советини жыйылыуунда толу тинтирге келишгендиле.

Эсгертиулерин комиссияны башчысыны орунбасары Олег Каздохов, келечилери Елена Кокутенко, Фатима Гешева, Чеченланы Георгий, Нодар Шарданов да этгендиле. Ала адамланы саулукъ сакълау бла байламлы жумушларын тамамлауну игилендирир ючюн  страховой компанияланы жерлерин белгилерге, жыл санлары жетген эмда къолайлары аз инсанлагъа   кёп заманны ичинде тохтаусуз къарау, Жамауат палатаны эсгертиулери къалай толтурулгъанларын эсепде тутуу, къарт эмда сакъат инсанланы социал жумушларын жалчытыу  бла байламлы болгъандыла.