Усталыкъларын сынагъандыла

Долинскде «Антарес» къошакъ билим бериу арада тургъанланы  жыр конкурслары ётгенди. Бу кюнледе уа Сабий эмда жаш тёлю чыгъармачылыкъны къаласында аланы отчёт концертлери болгъанды.

«Антаресде» тургъан  къызчыкъла бла жашчыкъла алгъадан да юч къауумгъа юлешиннгендиле: жашилле, кёкле эмда сарыла (галстукларыны тюрсюнлерине кёре). Атлары да башха-башха болгъанды: «Хыпыярла», «Изумруд», «Мурат».  Бу арада тургъан бир ыйыкъны ичинде жашла бла къызла насийхатчылары бла бирге  отчёт концертге кёп жырланы эмда композицияланы хазырларгъа онг тапхандыла. Жырлары уа хазна къалмай бары да келе тургъан  жангы жылгъа жораланнганла эдиле.

 Концерт ким да сюйюп къарарча болгъанды. Аны  эсде къалырча уа  «Къонгъуроула»  эмда «Къар» деген жырланы юч команда да бирге чыгъып   айтханлары этгенди.  Сахнада бирге жырлагъанла республиканы  тюрлю-тюрлю районларындан  келген алтмыш жаш бла къыз болгъандыла.

Сёзсюз, сабийле  «Антаресде»  насийхатчылары бла  шуёхла болгъандыла. Аны себепли ахыр кюнде бир бирден айырылыу да  алагъа  тынч тюйюл эди. Аны юсюнден  хоргъа къатышхан къызчыкъла бла жашчыкъла, аланы ата-аналары да сахнагъа чыгъып айтхандыла. КъМР-ни Жарыкъландырыу эм илму министерствосуну Сабий эмда жаш тёлюню чыгъармачылыкъны къаласыны, «Антарес» билим бериу араны оноучуларына,  конкурсну къурагъанлагъа, анга къатышханлагъа да  ыспас этгендиле, кёп игиликле тежегендиле. Насийхатчыла уа сабийле юйренирге эринмегенлерин, эрикмегенлерин, фахмулула болгъанларын да  белгилегендиле.

Ахырында жыр конкурсха къатышханланы барысына да сертификатла берилгендиле.

Сабий эмда жаш тёлю чыгъармачылыкъны къаласыны директору Аксана Карашева уа  бу жол «Антаресни» кезиулю къауумуна кирген сабийлеге, аланы  ата-аналарына, устазларына, музыкалы башчыларына хорда жырлауну искусствосуна жол ачханлары, анга сюймекликлерин къозгъагъанлары  ючюн ыразылыгъын билдиргенди. «Сёзсюз, насийхатчыла Зарета Дзуганованы, Наталья Круглованы, Кристина Крючкованы ишлери  тынч тюйюл эди, болсада ала аны айыпсыз тамамлагъандыла. Мындан ары да барыгъыз да  тутхан  ишигизде жетишимли  болугъуз!» - дегенди.