Батырлыкълары айтылгъанлай турлукъду

2025 жылны 9 декабринде, Ата журтну Жигитлерини кюнюнде, Нальчикни 10-чу номерли мектебинде аны алгъыннгы окъуучулары энчи аскер операцияда жигитлик этген Дзагаштов Аслан Анзоровичге бла Стадник Денис Сергеевичге эсгертме къангала ачхандыла. Анга жораланнган жыйылыугъа «Единая Россия» политика партияны Нальчик шахарда толтуруучу секретары Адыгаунова Анжела, шахарны жер-жерли администрациясыны билим бериу департаментинде къошакъ билим бериу, юйретиу эм социализация бёлюмюню таматасы Тхагапсоева Светлана, окъуучула, устазла, жамауат биригиулени келечилери да къатышхандыла.

Жигитлеге эсгертме ачыла туруп сёлеше, ала окъугъан школну директору Байрамукъланы Касайны къызы Фатимат былай дегенди: «Аллыбызда ёсген, школубузну бошагъан жашчыкъла эдиле. Аланы ахшы умутлары алда болгъанды, жарсыугъа, алагъа энди жеталлыкъ тюйюлдюле», - деп, жюрегинде сёзлерин Къулийланы Къайсынны назмусу бла бегимлегенди. Поэтни «Ёлмесинле сабийле» деген сёзлери битеу дуниягъа мамырлыкъ тилекча эшитиледиле.  
Бу жумуш баргъан кезиуде школну администрациясы  жигитлени юслеринден быллай шартла келтиргенди:

Дзагаштов Аслан Анзорович 1997 жылда 19 июньда Нальчикде туугъанды. Школну жетишимли бошагъандан сора, 2016 жылда  Къабарты-Малкъар къырал техника колледжни юристлени хазырлагъан бёлюмюне киргенди. 2017 жылны май айында аскерде къуллукъ этип къайтханды, окъууун заочно бошагъанды. 

 2020 жылда  Владикавказда, контракты тауусулуп,  къуллукъ этип бошагъанды. Энчи аскер операция башланнганда, Асланны ары барыргъа мураты болса да, анасыны къайгъы этеригин ангылап, бираз мычыгъанды. Эки жыл мындан алгъа уа,  анасына билдирмей, Ата журтун къорууларгъа кетгенди. Биринчи кере ол 2025 жылны апрель айында жаралы болгъанды. Ол сермешни кезиуюнда аны башчылыгъында россейли аскерчиле Украинаны аскерлери жарым жылны ичинде къолда тутхан жерни алгъандыла. Аслан «Кишиликни» эм «Жигитликни» майдаллары бла саугъаланнганды. 

2025 жылда 12 сентябрьде Донецк Халкъ Республиканы  Краматорск районуну Алкесандро-Калиново элини къатында баргъан къазауатда Аслан  Дзагаштов, ауур жаралы болуп, жан бергенди. Ол «Кишиликни» ордени бла саугъаланнганды.

Стадник Денис Сергеевич 1991 жылда 10 февральда туугъанды. 2006 жылда школну бошап, Къабарты-Малкъарны экономика эм право лицейине кирип, аны тауусханды. 2009 жылда аны аскерде къуллукъ этерге чакъыргъандыла.  2010 жылны октябрь айындан башлап, 2012 жылны август айына дери ол РФ-ни ич ишле органларында къуллукъ этгенди. 2014 жылны май айында контракты тауусулгъанды.  2019 жылда уа хауа десант аскерледе контракт бла къуллугъун башлайды. 

Денис энчи аскер операция баргъан жерде десант-штурмалы ротаны санында къазауатха киргенди. Сермешлени биринде душман къуршоулагъан 13 россейли солдатны ёлюмден къутхарыргъа болушханды. Стадник Денис 2022 жылны март айында жигитча сермеше ёлгенди, Кишиликни ордени бла саугъаланнганды.

Дзагаштов Аслан Анзоровични бла Стадник Денис Сергеевични атлары  ала окъугъан школну къабыргъасында эсгертме къангагъа эм аланы таныгъанланы бла билгенлени жюреклеринде ёмюрге жазылгъанлай къаллыкъдыла. Жашлай дунияларын алышхан жигитлени къыралларына, Ата журтларына сюймекликлери, антларына кертичиликлери ёсюп келген тёлюге юлгю болгъанлай турлукъдула.