Предприниматель тиширыуланы саны кёбюрек болгъанды

МСП Корпорацияны тергеулерине кёре, информация технологияла эмда химия производство бёлюмледе къармашхан предпринимательлени арасында экиден бири тиширыула болгъандыла. Бу кёрюмдю ахыр жыллада бек ёсгенди. Сагъынылгъан технологиялада жаланда беш жыл мындан алгъа - 38, химия сферада уа 33 проценти тиширыу предпринимательле эдиле.

Къабарты-Малкъарда да бу жаны бла болум алай тюрлене баргъаны эсленеди. Республиканы Экономиканы айнытыу министерствосундан билдиргенлерине кёре, тиширыула бизде да бизнесге бек тири къатышадыла: Къабарты-Малкъарда энчи предпринимательлени 39 проценти (6,8 минги) ма аладыла.

Саулай къыралда уа предпринимательство бла (41%) 1,9 миллион тиширыу кюрешедиле. Энтта да 6,5 миллиону (44%) кеслери иш къурап къармашханланы санындадыла.

Бёлюмлеге къарагъанда, тиширыу предпринимательлени кёбюсю аланы ма быларында урунадыла: социал жумушла тамамлау, юс кийимле чыгъарыу, туризм агентстволаны ишин бардырыу, билим бериу, право эмда бухгалтерия эсеплеу, ветеринария, HR. Бизни республикада алагъа «Гитче эмда орта предпринимательство, сора энчи предпринимательство башламчылыкълагъа билеклик этиу» миллет проектни чеклеринде себеплик этиледи, дегендиле министерствода.