Тахта кёгетле багъаракъ, тюклю тонла бла техника уа учузуракъ болгъандыла

Быйыл октябрьде Къабарты-Малкъарда аш-азыкъланы эмда башха товарланы багъалары жарым процент къошхандыла, жумушла уа учузуракъ болуп башлагъандыла. Тийишли тергеулерини эсеплери бла Россейни Банкыны республикада бёлюмю шагъырейлендиргенди.

Сурам азайгъаны ючюн тыш къыраллада солууну багъасы 18,5 процентге тюшгенди, аны себепли сомну сыйы да аз-маз кётюрюлгенди. Тахта кёгетле бла жемишле уа багъаракъ болгъандыла. Нек дегенде бахчалада ёсген продукция азайгъанды, тюкенледе уа аланы орунуна теплицалада битген кёгетле эмда жемишле чыкъгъандыла.

Бал туз а учузуракъ болуп башлагъанды. Банкны тергеулерине кёре, ол аны чыгъарыу кёбейгени ючюндю. Тюкенле да бал чюгюндюрню жангы тирлиги жетер кезиуге къыстырыкъларын терк-терк сатып хазырланнгандыла.

Аш-азыкъладан башха затланы юсюнден айтханда, кезиуюне кёре сурам ёсгени ючюн тюклю тонла эмда жылы кийимле энди багъаракъ турадыла. Аланы чыгъарыучула да кеслерини сырьёгъа эмда иш хакълагъа этген къоранчларын продукцияларыны багъаларыны юсюне къошаргъа кюрешедиле - ол а аланы ёрге тюртеди.

Бытовой техника, смартфонла, башха электроника да учуздан учуз бола барадыла. Алай болгъанны сылтауун бир жаны бла сомну сыйы кётюрюлгенинден, башха жаны бла уа хайырланыучулагъа кредитле бериу азайгъандан кёрюрге тийишлиди.

Жыллыкъ инфляция Къабарты-Малкъарда озгъан октябрьде 7,4 процент болгъанды. Ол саулай къыралда орта кёрюмдюден азды. Алай ол мындан арысында да тюшюп барырча сурам артыкъ тири ёсмезге керекди. Алай болур ючюн а Россейни Банкы кредитлени эмда депозитлени процент ставкаларын бийикде тутады. Аны хайырындан келир жылда инфляция 4-5 процентге жетип, андан арысында да ол мардадан озмай турургъа керекди.