Элни тийресин айбатландыра

Черек район Халкъны бирлигини кюнюне тийишли хазырланнганды дерге боллукъду. Къашхатау, Герпегеж, Жемтала эм Огъары Жемтала эллеге кирген жерледе орнатылгъан стелаланы бир къауумун жангыртхандыла, башхалада уа эллени атлары жазылгъан омакъ тюрсюнлюлени жарашдырып салгъандыла.

Алай бла энди Герпегеж элге келгенле Россейни байрагъыны бояуларында ишленнген стеланы эслемей къоймазлыкълары хакъды. Андан сора да, ол тийреде адамла олтуруп солурча онгла къуралгъандыла. Тёгерекни чыракъла да жарытадыла. Гюл бахчала къураллыкъ  жерле да белгиленнгендиле. Дагъыда алайда суратха тюшерча «Мен Герпегежни сюеме» деген жюрек сыфатда жарашдырылгъан тийре  да барды. 

КъМР-ни Къурулуш эм жашау журт-коммунал мюлк министерствосундан билдиргенлерине кёре, байракъланы кётюрюрча амалла уа, Герпегежден сора,  Къашхатауну тийресинде да къурашдырылгъандыла.