Орта кюн Кёнделенде Энейланы Тимур атлы 4-чю номерли орта школда «Солдатны анасыны жюреги» деген эсгериу ингир ётгенди. Аны Элбрус районну тиширыуларыны совети, маданият управлениясы къурагъандыла.
Тюбешиу Уллу Ата журт урушда жоюлгъан 800 аскерчини эсгериу майданында башланнганды. Элбрус районну администрациясыны башчысы Отарланы Мухтар, къонакъланы алларында сёлеше, быллай тюбешиулени магъанасы уллу болгъанын чертгенди. Ала жигитлени аналарыны алларында энтта да баш урургъа, ёсюп келген тёлюню алагъа хурмет этерге кереклисине тюшюндюрюрге онг бередиле, дегенди.
Ол кюн дагъыда афган урушда, энчи аскер операцияда жигитликлерин кёргюзтюп ёлгенлени эсгертмелерине да гюлле салыннгандыла.
Ызы бла къонакъла, къонакъбайла да школда жыйылгъандыла. Мында адет, намыс, патриот сезим босагъадан окъуна эслене эди. Бирча ариу кийиннген окъуучула къонакълагъа жарыкъ тюбегендиле.
Ингирни школну сабий садына жюрюген сабийле ачхандыла. Хар бирчиги, ананы жюрегине жетерча ариу сёзле айта, дуния башында эм багъалы жан сабийге ана болгъанын, ол ёмюрюню ахырына дери баласын къоруулай жашагъанын да айтхандыла. Къызчыкъланы къаууму Газаланы Алимни айтыуунда «Ана» деген жыргъа кёре салгъан сахна оюнлары ананы жюрегин толусунлай суратлай эди. Тепсеуде ананы жарсыуу, жюрегини таралыуу бла ышаныуу сезиле, къонакъланы кёллерин такъыр этгенди.
Элбрус районну тиширыуларыны советини таматасы Моллаланы Зарета, ары келген хар анагъа баш ура, ыспас эте, жюрек жылыуларын, игиликге ийнаныуларын тас этмезлерин, саулукълула болурларын да тежегенди.
Районну башчысы Отарланы Мухтар, бу дунияны тутхучлулугъу ананы жылыуу болгъанын айта, бар аналагъа кийик саулукъ тилегенди. Жашлары къазауатда ёлген, жаралы болгъан аналагъа сабырлыкъ тежегенди. Быллай аламат тюбешиуню къурагъанлары ючюн тиширыуланы советине бла 4-чю номерли мектепни таматасы Атмырзаланы Мухтаргъа уллу ыспас этгенди.
Ол кюн дагъыда кёпле сёлешгендиле. «Аскерчини анасыны жюреги жылла озгъандан сора» деген къонакъбайлыкъ кенгешни жигитлери уа урушну кезиуюнде кеси юйюрлери сынагъанын эсгергендиле. Отарланы Омарны атын жюрютген краевед музейни таматасы Этезланы Фатима, Ата журтларын къоруулай жан бергенлерин ата бла ана къарындашларын эсгере, аланы сакълагъан анала кеслери дунияларын алышхынчы дери да аланы ёлгенлерине ийнанмай жашагъанларын айтханды.
Ызы бла «Горянка» газетни баш редактору Зарина Канукова сюймекликни жашауда къаллай уллу кючю болгъаныны юсюнден айтханды. Бютюнда ананы балагъа сюймеклигин айтып ангылатхан къыйынды, дегенди.
Кёнделенде тёрт аламат жашны анасы Тюбейланы Фатиматха уа сабийлени ёсдюрюуде эм магъаналысы не болгъанын соргъандыла. «Миллет тёрелени бла адетлени сабий жюрекге гитчелигинден сингдириу, абаданланы хурметлей билирге юйретиу, адамлыкъ эм кишилик ышанланы бла шартланы юлгюлеринде ёсдюрюу», - дегенди ол.
Окъуучула «Баллада о матери» деген назмугъа салгъан сахна оюн къуру тиширыуланы угъай, эр кишилени да кёз жашларын келтиртгенди. Анда къызчыкъ, ол назмуну айта туруп, жарлы ана эки жашын немисли солдатладан къутхарыр ючюн, алагъа жалына эди. Немислиледен бири, ананы сынар муратда, эки жашындан бирин сайларын буюрады. Жарлы ана къалай бла сайлар эди, экисини арасында жюреги жарыла тургъунчу, жашланы экисин аны кёз аллында ёлтюредиле. Ана, балаларыны башларын сылай, алайда жан береди. Бу сахна оюнну сабийле болмагъанча аламат салгъандыла.
Аскерчилени аналарыны комитетини КъМР-де регион бёлюмюню таматасы Жанна Луева, жашы СВО-дан кёп болмай келгенин айтып, бар аналагъа да жашлары юйлерине сау-саламат келирлерин тежегенди. Баласы къазауатда болгъан кезиуде кечеси да кече, кюню да кече болгъанча жашагъанын букъдурмай айтханды. Ата журтну эркинлиги ючюн къазауат эте тургъан жашлагъа болушлукъ этиуде жюрегине себеплик тапханын да букъдурмагъанды. Республиканы Башчысы Казбек Коков аскерчи жашларыбызгъа бек сакъ болгъанын айтып, жюрек ыразылыгъын билдиргенди. Андан сора Элбрус районну жамауатына бу жумушха тири къатышханы ючюн ыспас этгенди.
Афган урушну ветеранларыны район бёлюмюню таматасы Князланы Алим аналагъа жюрек ачыкълыкълары, тилеклери бла дууалары ючюн, Ата журтну къоруулаудан артха турмагъан жигит жашла ёсдюргенлери ючюн да махтау салгъанды.
Районну Билим бериу управлениясыны таматасы Атаккуланы Нюржан ариу сёзле бла аналаны жюреклерин жапсарыргъа кюрешгенди. Фахмулу къыз Ахматланы Люба уа назмусун окъуп, дуния башында мамырлыкъ болурун тежегенди.
Къонакъла сабийле кеси къоллары бла хазырлагъан сурат кёрмючге да къарагъандыла. Анда аналагъа аталгъан плакатланы ариулукълары, керти суратлача, къарагъанны жюрегин къозгъай эдиле. Андан сора келгенле сабийлени хору айтып, патриот жырлагъа тынгылагъандыла. Миллет хазнабыздан кёрмючге бла мастер-классха да къарагъандыла.
Элбрус районну артистлери Атмырзаланы Танзиля бла Ёзденланы Танзиля къонакълагъа аламат жырларын саугъалагъандыла. Ногъайлыланы Мариям а жыр бла хар ананы жюрегине жеталгъанды. 83 жылы болгъан Гергъокъланы Лейля уа Уллу Ата журт урушда жоюлгъан къарындашына этген жырын кёз жашларын сыйпай айтханды. Жолабланы Муслим «Ана» деген жырында аламат жюреклери ючюн битеу аналагъа ыспас этгенди.
Хар сёлешген школну устазларына, аланы таматалары Атмырзаланы Мухтаргъа энчи ыспас этгендиле.
- Окъуучуларыбызгъа аламат юлгю берген жумушладыла была. Биринчиден, сабийлени коллективге бирикдирирге, экинчиден, тарыхыбызны эслеринде тутаргъа, ючюнчюден а, ананы магъанасын ангылап, анга тийишли сый берирге юйретирге себеплик этедиле. Ишибизде ёсюп келген тёлюге Ата журтларын сюерге, анга кертичи болургъа дегенча патриот сезимлени акъылларына сингдириуню баш борчларыбыздан бирине санайбыз, - дегенди ол.
Эсгертиу: «Аскерчини анасыны жюреги» деген битеуроссей акция Тимошевск шахарда Епистиния Степановагъа жораланып башланнганды. Ол Уллу Ата журт урушха тогъуз жашын ашыргъан эди. Ала барысы да ауур жаралы болуп ёлгендиле. Жашладан бирине уа Совет Союзну Жигити деген сыйлы ат берилгенди (ёлгенден сора). Анча жашны Ата журтларына кертичиле болуп жан берирча ниетде ёсдюргени ючюн, Епистиния аламат аскерчи ананы юлгюсюне саналады.
