КъМР-де МВД-ны миграцияны вопрослары жаны бла управлениясыны ишини, ол санда озгъан жылда эсеплерини юсюнден аны таматасыны орунбасары полицияны подполковниги Мурат Загаштоков бла ушакъ этебиз.
-Мурат Адальбиевич, миграцияны ишлери жаны бла бёлюм къаллай жумушла тамамлагъанын окъуучуларыбызны эслерине салыуну тийишли кёреме.
-Биз республикагъа келген тыш къыраллы гражданла, гражданлыкълары болмагъанла да федерал законлагъа бузукълукъ этмезлерине, Россей Федерацияны инсанлары уа аланы законсуз ишлетмезлерине къарайдыла. Контроль-надзор ишлеге кёре административ оноула чыгъарадыла.
Саулай алгъанда, бизни бёлюм онжети къырал жумушну тамамлайды. Аланы санына паспортла бериу эмда аланы алышындырыу киреди. Ол санда тыш къыраллы,электрон паспортла да бизни юсюбюз бла бериледиле. Андан сора да, РФ-ни инсанларын эсепге салыу, тыш къыраллылагъа бизге келирге эркинлик бериу, кесибизни адамларыбызгъа уа тыш къыраллада ишге тохтаргъа себеплик этиу, кёчгюнчю статусну тийишли кёрюу, миграция эсепге алыу,тыш къыраллылагъа визала, мында ишлерге эркинлик, патентле бериу да бизни боюнубуздады.
-Бузукълукъ этгенле уа кёп тюбеймидиле, ала жууапха къалай бла тартыладыла?
-2018 жылны онбир айыны ичинде 15 миллион сомдан асламгъа административ тазирле салыуну юсюнден 11 минг чакълы протокол жарашдырылгъанды. Бюгюнлюкге аладан 95 процентинден асламы тёленнгенди. Андан сора да, миграцияны юсюнден законнга эмда регистрация эсепни жорукъларына бузукълукъ этгенлери ючюн РФ-ни УК-сына кёре 12 уголовный иш ачылгъанды.
-Къарайма да, ишигиз кёпдю, къыйынды, жууаплыды. Аны тийишлисича толтурур ючюн не амалла этесиз?
-Былтыр 195 минг къырал жумуш тамамланылгъанды, ол санда 30 мингнге жууугъу республиканы кёп функциялы арасында, 42 мингден асламы электрон амал бла. Бизни баш борчларыбыздан бири - адамланы къаллай категорияларына да тап болумла курап, жумушларын терк да, тынгылы да толтурууду. Аны ючюн деп биз ай сайын соруула бардырабыз, эсепле чыгъарабыз. Анга кёре уа ишни игилендириуню мадарларын этебиз.
Тергеулеге кёре, бюгюнлюкде миграцияны ишлери жаны бла бёлюмледе (ПВМ) инсанларыбызны жумушлары терк эмда тынгылы тамамланыладыла. Ол а РФ-ни Президентини 2012 жылда май указларына толусунлай келишеди. Жумуш бла келген адам кесини кезиуюн онбеш минутдан кёп сакъламайды.
-КъМР-ни МФЦ-лары сизни бла байламлы не жумушла тамамлагъанларыны юсюнден толуракъ айтсагъыз эди?
-Республикада МФЦ-ны 13 филиалы ишлейд. Ала тёрт тюрлю къырал жумушну тамамлайдыла: паспортла, ол санда тыш къыраллы паспортла, жарашдырып бередиле, бери келгенлеге эмда адамны жашагъан жеринде регистрация этедиле, тыш къыраллы гражданланы эмда гражданлыкълары болмагъанланы миграция эсепге аладыла.
Жууукъ заманда тыш къыраллы паспортланы электрон амалларын берирге документле алып башларыкъдыла. Ала он жылгъа берилликдиле. Аны ючюн деп республиканы кёп функциялы арасы битеу керекли оборудование сатып алгъанды, ала тийишли программала бла жалчытылгъандыла. Бусагъатда уа МФЦ-да специалистлени юйретиу иш бардырылады.
