Халкъла аралы тарых школ – кёп миллетлени келечилерин жууукълашдыргъан майдан

Кёп болмай Къабарты-Малкъар къырал университетни Элбрусда билим бериу-илму арасында 10-чу  Халкъла аралы тарых школ къууанчлы халда  ачылгъанды. Байрамгъа Россейден, Гюржюден, Таджикистандан, Египетден, Индонезиядан, Камерундан, Словакиядан  эм башха  къыралладан келип окъугъан 130 жаш бла къыз къатышхандыла.   

Жыйылыуну башлай, Россейни тарых биригиуюню правленини таматасы Руслан Гагкуев школну ачыуну магъанасы  Россейни тарыхындан тюз хапар билдирирге, жарыкъландырыу программалары бла шагъырей этерге, байламлыкъла къураргъады, деп эсгертгенди. 

- Ол хар жолдан да башха-башха жерледе къуралады. Анга кёре жерлешлерибизге эм къонакълагъа да  къыралыбызны жангы жерлерин ачаргъа кюрешебиз. Элбрусда Къабарты-Малкъарны тарыхындан, маданиятындан эм адамланы харкюнлюк жашауларындан толу хапар билирге онгугъуз боллукъду. Россейни жомакълы табийгъаты эм огъурлу адамлары да эсигизде кёпге сакъланыр деп, бек ышанама,- дегенди Руслан Григорьевич. 

Халкъла аралы тарых школгъа къатышханланы Россей Федерацияны Президентини Шимал-Кавказ федерал округда толу эркинликли келечиси    Юрий Чайка да тюзюнлей эфирде алгъышлагъанды. 

- Тарых школ  къыралыбызны бай маданият хазнасы бла толуракъ  шагъырейленирге онг тапдырады. Ол санда адет-тёрелерибизни билирге, башха къыралланы маданиятларыны энчиликлерин сюзерге да болушады. Сизни къыйматлы проектлеригиз  адам улуну сейир жашауун ачыкълауда уллу къошумчулукъду. Ишчи программаны кезиуюнде лекцияла, семинарла, тюбешиуле да ётерикдиле. Ала сизни билимигизни байыкъландырмай къоярыкъ тюйюлдюле,- дегенди Юрий  Яковлевич. 

Ызы бла КъМР-ни Правительствосуну  Председателини орунбасары Залим Кашироков республиканы Башчысыны   Казбек Коковну алгъышлау письмосун окъугъанды. «Тарых школ билимни ёсдюрюу бла чекленип къалмайды, байламлыкъла къураргъа, ол санда   шуёхла да  табаргъа онг береди.  Къабарты-Малкъар  эрттегили тарыхы эмда бай маданияты бла да ёхтемленирге боллукъду, ол къонакъбайлыгъы бла да атын айтдырып келеди», - деп айтылады письмода.  

Программагъа къатышханланы алгъышлай, Къабарты-Малкъар къырал университетни  билим бериу жаны бла проректору  Вадим Лесев  КъМКъУ-да Россейден тышында эки жыйырма къыралдан онтогъуз минг чакълы студент окъугъанын билдиргенди.

«Биз алагъа тарыхыбыздан теренирек билим бериу жанлыбыз эмда Россейни тарых биригиую бла къысха байламлыкъ жюрютебиз»,- деп, ол бюгюнлюкде КъМКъУ «Приоритет-2030» деген стратегиялы программагъа тири къатышхан эмда  айный баргъан илму-билим бериу арагъа саналгъанын да эсгертгенди. 

Тёреде жюрюгенича,  ол кюн КъМКъУ Россейни тарых  биригиуюню китапханасына  китапла да саугъалагъанды. 

Ызы бла студентлеге бла жаш алимлеге насийхат сёзлери бла Росейни тарых биригиуюню республикада бёлюмюню советини  таматасы, КъМКъУ-ну жаш тёлю бла ишлеу жаны бла доценти Баразбийланы Муслим сёлешгенди. «Тарых бла байламлы илму бла  кюреширге дей эсегиз, бек алгъа адам улуну бирикдирген шартланы багъалай билигиз»,- дегенди. 

Беш кюнню ичинде школну сохталары «Уллу Ата журт урушну тарыхы», «Россейде экономика жаны бла тюрлениуле»,  «Россейли искусство бла  маданият», «Харкюнлюк антропология», «Тарыхны тинтиуде цифралы  технологияла» дегенча темала  бла байламлы тынгылы  программалагъа къатышырыкъдыла. Аланы хар бирине кёре лекцияла эм белгили алимле бла  тюбешиуле да къураллыкъдыла.  

Ахырында жаш адамла, командалагъа юлешинип, тарых-жарыкъландырыу проектлерин ачыкъларыкъдыла.