Поэтге, чынтты адамгъа хурмет бере

Озгъан орта кюн Нальчикде Байсолтанланы Алимни атын жюрютген  орамда  белгили поэт, прозаик, КъМР-ни культурасыны сыйлы къуллукъчусу Лиуан Губжоковну хурметине, ол жашагъан 25-чи  номерли  юйню къабыргъасында  мермер къанга орнатылгъанды.

Митингге къатышыргъа КъМР-ни парламентини, республиканы министерстволарыны, ведомстволарыны, жамауат организацияланы, КъМР-ни  Жазыучуларыны союзуну келечилери, культураны эмда искусствону белгили къуллукъчулары, поэтле, жазыучула, Лиуан Губжоковну шуёхлары, жууукълары да келгендиле.

Митингни  шахарда 29-чу номерли гимназияны тюрлю-тюрлю класслада окъугъан  сабийле  поэтни назмуларын юч тилде айтыу бла ачхандыла.

КъМР-ни культура министри Мухадин Кумахов,  жыйылгъанланы аллында  сёлеше, былай дегенди: «Бюгюн къаллай ариу, жарыкъ кюндю. Лиуан Мухамедович да тюз аллай адам эди. Аны бла байламлы битеу ишле да  алайдыла. Табийгъат да  сюе эди аны. Ол орус, ана, малкъар тиллени да бирча дурус билгенди. Аны ючюн шуёхлары да кёп эдиле. Лиуан Губжоковну чыгъармачылыгъы Къабарты-Малкъарны адабиятына жангы аязны юфгюргенди. Жашауу да  алай эди аны. Ол, фахмулу поэтча, шуёхлукъну да аламат  жюрюте билгенди, адамлыкъ фахмусу да бек уллу болгъанды. Аны юсюнден бир адам да осал сёз айталлыкъ тюйюлдю. Ол кесин толусунлай усталыгъына бергенди эмда ызындан а  поэзияны жарыкъ да, уллу да  жилтинин къойгъанды. Мындан ары да кёп жыллагъа жанып турлукъду ол,- дегенди министр. Дагъыда Мухадин Лялюшевич поэтни хар назмусунда жюрегинг жаратхан затны эмда  иги кесек жылладан бери туууп тургъан къаллай  соруунга да  жууап  табаргъа боллугъунгу, ол ёмюрлюк хазна: жашауну, ата журтну, сюймекликни  юсюнден жазгъанын, Лиуан Губжоков чынтты поэт болгъанын, чыгъармаларыны хар тизгининде да   магъана болгъанын, битеу ол затла ючюн  поэт не заманда да бизни бла бирге боллугъун чертип  айтханды.

КъМР-ни Жазыучуларыны союзуну председатели Байтуугъанланы Исмайыл а поэтни халал жюреклилигини, уллу адамлыкъ шартыны, аны миллетлени, динлени айырмагъан огъурлу жюрегини юсюнден айтханды. «Лиуан Мухамедович жаланда элли бир жылгъа жууукъ заманны жашагъанды. Алай ол къысха ёмюрюню ичинде окъуна къабарты поэзияны, адабиятны айнытыууна кесини уллу юлюшюн къошханды. Бюгюнлюкде аны аты Къабарты-Малкъарны адабиятында эм иги классиклени  арасында  айтылады. Ол миллетчи болмагъаныны юсюнден аны назмуларын окъугъан адам сора турмай ангыларыкъды. Лиуан Губжоков  республиканы литературасында кесини ызын къойгъан бла къалмай, миллетлени араларында  бирликли, тынчлыкълы жашауну къураугъа, кючлендириуге да  къошумчулугъу уллу болгъанын чертип айтырчады. Аны назмуларына жырла жазылгъандыла. Ол дуниядан кетгенликге, назмулары, этген ахшы ишлери унутуллукъ тюйюлдюле. Ёсюп келген тёлю аны айтханларын эсинде тутарыгъына ишегим жокъду. Ол чынтты, кертичи адам эди»,-дегенди Байтуугъан улу.

Тарыхчы-архивист, жазыучу Сафарби Бетуганов поэт бла иги кесек жылны шуёхлукъ жюрютгенини юсюнден эсгергенди эмда аныча поэтле алыкъа республикада жаратылмагъанларын чертгенди. «Бюгюн биз поэт, инсан эмда керти адам Лиуан Губжоковну хурметлейбиз. Аны ызы бизни культурабызда ёмюрлеге къаллыкъды. Мен не заманда да аны бла ишлеген жылларымы эсгериучюме. Ол акъыллы, кёпню билген, аны бла бирге уа халал жюрекли да адам эди. Лиуан халкъы, аны тарыхы бла да къаты  байламлыкъ жюрютгенди, аны назмулары анга шагъатдыла. Ала бюгюн да  кёп жыл мындан алгъача ачыкъ, жарыкъ эшитиледиле. Ала аны Ата журтха, сюймекликге кертичилигине шагъатлыкъ этген  ышанларыдыла.

Жыйылгъанланы аллында  Лиуан Губжоковну шуёху Юрий Тхагазитов да сёлешгенди.

Ахырында уа поэтни жашы Алим атасыны аты бла  мермер къанганы салыуну дурус кёрген эмда ол кюн алайгъа келген хар кимге да жюрек ыразылыгъын билдиргенди. «Бу кюн бизни юйюрге мудах  аны бла бирге уа ёхтем да кюндю. Бизни атабызны аты ёмюрлеге  халкъыны тарыхына киргени бла байламлы ёхтемленебиз. Бу мермер къанга аны чыгъармачылыгъын эсде тутууну  эмда чынтты искусствону  ёлюмсюзлюгюню белгисиди»,-дегенди.

Лиуан Губжоковха  ачылгъан мемориал къанга – поэтни чыгъармачылыгъына аталгъан бош белги тюйюлдю, ол назмуларында  айтхан: ата журтха, жашаугъа, адамгъа сюймекликни багъалы белгисиди. Энди ол юйню къаты бла ётген хар адам, алайда поэтге хурмет эте кетер онг табарыкъды.

Митингни ахырында, тёреде болуучусуча, мермер къанганы тюбюне гюлле салгъандыла.

Поэт, прозаик Жемтала элде туугъанды, КъМКъУ-ну тарых филология факультетин бошагъандан сора,  Н.Крупская атлы китапханада, Жазыучуланы союзунда, «Ошхамахо» журналда ишлегенди, СССР-ни Жазыучуларыны, журналистлерини да союзларыны къауумуна киргенди. Ол онжети китапны авторуду, ол сабий литературагъа да иги кесек юлюшюн къошханды. Республиканы культура жашаууна къошхан уллу юлюшю ючюн аты ёмюрлюк этилгенди.

    Холаланы Марзият.