Къабарты-Малкъар Республиканы Башчысы К.В.Коковну Къуллукъларын толтура ёлген полициячыланы эсгериуню кюню бла байламлы чакъырыу сёзю

Багъалы жерлешлерим!

13 октябрьде бизни республикада Къуллукъларын толтура ёлген полициячыланы эсгередиле. Ол кюн Нальчикде болгъан бушуулу ишле бла байламлыды. Ол заманда сауутланнган къауумла Къабарты-Малкъарны ара шахарына чабыууллукъ этгендиле. Алагъа къажау кюрешде право низамны сакълаучу органларында къуллукъ этгенледен 35 адам, мамыр инсанладан да 14-сю ёлгендиле. 

Ол кюйсюзлюк, террористлени кёп башха огъурсуз ишлерича, терроризмни мурдарлыкъ, малгъунлукъ бетин ачыкъ этгенди. Аны кечер амал жокъду.

Андан бери 20 жыл озгъанды, алай ол заманда салыннган жарала энтта да сынтыл болмагъандыла, хар бирибизни да жюрегин ачытханлай турадыла. Террористлени къолларындан ёлгенлени атлары эсибиздедиле, къуллукъ борчларын толтура, антларына кертичи болуп, жашауларын аямай, халкъыбызны уллу палахдан къутхаргъанланы алларында баш урабыз, жигитликлери эмда ётгюрлюклери ючюн махтау салабыз!

Бюгюнлюкде, жангы террорчулукъ къоркъуула чыкъгъан, ол санда украинлы неонацистле баш кётюрген заманда, биз, бирге болуп, терроризм эмда экстремизм бла байламлы не тюрлю ишлеге да бек къаты къажау сюелирге керекбиз.

Власть органла, право низамны сакълаучу къурамла, саулай жамауат да кючюбюзню бирикдирсек, ол кюйсюзлюкню жолун кесерге, ахырында уа  хорлап чыгъаргъа, туугъан Къабарты-Малкъарыбызны келир заманда жашауу да къоркъуусуз эмда къолайлы болурча этерге къолубуздан келлигине ишексизме.