Бохчасындан къуру къалгъан саудюгерчи

(Тыш къыралланы жомакъларындан)

Текуланы Жамал, китап чыгъарыр умут бла, кёп тыш къыралланы халкъларыны жомакъларын малкъар тилге кёчюргенди. Биз бюгюн аладан бирин басмалайбыз.

Эртте-эртте бир саудюгерчи жашап болгъанды. Бир жерде абериле сатып алып, аланы башха жерде сатып, аны бла тутханды башын.

Бир жол саудюгерчи черек жагъада солургъа тохтагъанды, тюшлюк да этгенди, ызы бла алгъан затларын кериуаннга жюклеп, жолгъа атланнганды. Иги кесек баргъандан сора, ичинде ахчасы бла бохчасын суу жагъада къоюп кетгенин эслегенди. Терк окъуна артха къайытып, бохчасын излеп тебирегенлей, бир адамгъа тюбегенди.

- Не излейсе былайда, - деп соргъанды ол адам.

- Бохчамы излейме, - дегенди саудюгерчи.

- Къаллай бир ахчасы бар эди?

- Жюз сом, - дегенди саудюгерчи.

- Мен тапхан болурма аны! Ма сомларынгы! - дегенди ол адам, бохчаны иеси табылгъанына къууанып.

Саудюгерчи, ахчасын алгъанды да:

- Менде жюз угъай, эки жюз сом бар эди! Къалгъанын да къайтар, - деп тохтагъанды.

- Аллай бир тюйюл эди! Мен жюз сом тапханма! – деп, сейир этгенди ол адам.

Патчах айырсын арабызны деп, экиси да патчахха барып, болгъан ишни билдиргендиле.

- Къаллай бир ахчанг тас болгъанды? - деп соргъанды патчах саудюгерчиге.

- Эки жюз сом!

- Сен тапхан а къаллай бирди? - деп соргъанды бохчаны тапхан адамдан.

- Жюз сом! - дегенди ол.

- Сени, саудюгерчи, эки жюз сомунг тас болгъан эсе, аллай бирни ким тапхан эсе да, андан сура. Жюз сомну тапхан а аны кесинде къояргъа эркинди. Мен жюз сомну тас этгенме деп, излей келген адам болса, аны мен кесим тёлерме, - дегенди патчах.

Болгъанмыды алай, угъаймы - аны киши да билмейди, алай аллай хапар а жюрюйдю.