Сарымсахны да барды кюню

Алтынчы октябрьде дунияны кёп къыралларында сейир, аны бла бирге эртте заманладан келген байрамны – сарымсахны кюнюн – белгилейдиле.

Сарымсахны адамла хайырланып башлагъанлы мингле бла жылла озгъандыла. Аны ашха къошхандан тышында, дарманныча хайырланадыла, ол кюч, къарыу бергенине, кёп хатадан, хыйныладан сакълагъанына ийнаннгандыла.

Сарымсахны Буруннгу Мисирде (Египетде) да ёсдюргендиле. Кюч-къарыу берирча, аны айтхылы пирамидаланы къурулушларын бардыргъан ишчилеге бергендиле. Греклиле бла римлиле аны аскерчилени ашларына санагъандыла. Ол арыгъанлагъа кюч бергенди, жигитча сермеширге болушханды. Орта ёмюрледе сарымсах тишлени жукъгъан аурууладан сакъланырча хайырланнгандыла, ол шайтандан, жинледен сакъларыкъды деп ийнаннгандыла. Бюгюнлюкде да аш-суу хазырлагъан жерледе сарымсахны дайым кёрюрге боллукъбуз. 

Тинтиу ишледе белгилегеннге кёре, сарымсах адамны иммунитетин кючлейди, жюрекни тюз ишлетеди, къан тамырланы тазалайды, заранлы бактерияланы къурутады. Кёп къыраллада сарымсах къошулгъан азыкъланы хазырлап, ярмаркала, фестивальла къурайдыла. Ол къошулгъан азыкъла, саулукъгъа хайыр келтиргенден сора да, татыулу ашарыкъланы санында болгъанын белгилерчады. 

Сарымсахны кюнюнде аны ийиси бла байламлы лакъырда, масхара хапарланы эсге тюшюрюп, хапарла къурагъанла да бардыла. Бир сёз бла айтханда, сарымсах кёп миллетлени теренден келген маданиятлары, адетлери бла байламлы болгъаны шартды.