Финансла жаны бла билимли болурча

Кёп болмай Къабарты-Малкъар къырал университетни право, экономика эм финансла  институтуну окъуучулары ачыкъ эшиклерини кюнюнде Россейни Банкыны Къабарты-Малкъарда бёлюмюнде къонакъда болгъандыла. Аны кезиуюнде тамблагъы кюнню экономистлери билимлерин ёсдюрюрге эм сынамларын кючлерге да онг тапхандыла.   

Жаш адамлагъа банкны келечилери ахча-ёнкюч, финанс къоркъуусузлукъ, электрон халда ахча жюрютюуню къыйматлыгъы эм цифралы сом деген темала бла байламлы лекцияла окъугъандыла.

Бурун заманладан башлап бусагъатха дери жюрюй келген ахчаланы, акцияла бла облигацияланы кёрмючю студентлени бютюн сейирге къалдыргъанды. Мында бир жолгъа минг бла жарым экспонатны кёрюрге онг табылгъанды. Аланы арасында  бизни эрагъа дери сегизинчи  ёмюрде, орта ёмюрледе чыгъарылгъан ахчала да бардыла. 

Ызы бла банкны экспертлери жаш коллегаларына ахчаны айырыргъа, жыяргъа юйретгендиле, къурамлары бла шагъырей этгендиле, ичлеринде  жалгъанын тинтирча мастер-класс да бардыргъандыла.

Экскурсияны экономика эм учёт-аналитика информация системала жаны бла кафедрасыны преподавательлери Непеланы Халимат, Рита Кушбокова, Зарема Ягумова эм Карины Шумахова къурагъандыла.

Ачыкъ эшиклени кюнюнде жаш адамла усталыкълары бла толуракъ шагъырейленедиле, кеслерине жангы шартланы ачыкълайдыла, аны бла бирге сайлауларына сокъуранмазча да таукеллик табадыла.