Илмугъа аслам юлюш къошханла

Бу кюнледе кесини 60-жыллыкъ юбилейин белгили алим, КъМКъУ-ну математика эмда тюз илмула институтну органикалы химия эмда бийик молекулалы къошулуула кафедрасыны профессору Тимур Борукаев белгилейди. 1984 жылда ол университетни химия-биология факультетине окъургъа киргенди. Аны жетишимли бошап, химик усталыкъны алып, ызы бла кесини билимин аспирантурада ёсдюргенди.

Тимур Абдуловични илмугъа жолу ол Москвада РАН-ны Топчиев атлы нефтехимиялы синтез институтунда диссертациясы бла ишлеген кезиуюнде айный тебиреген эди. 1994 жылда илмуланы кандидаты даражагъа ишин жетишимли къоруулагъанды, аны уа ол полиазометин эфирлени синтезлери бла къурамларына жоралагъанды.

Ызы бла КъМКъУ-ну мурдорунда «МАРС» деген Сынау-конструктор-технология бюрода гитче илму къуллукъчудан башлап лабораторияны таматасына дери жетгенди. Аны бла бирге уа химиялы экология кафедрада жаш тёлюню окъутхан да этгенди.

2003 жылда уа илмуланы доктору даражагъа диссертациясын къоруулагъанды. Аны уа полубутилентерефталатны жарашдырыу эмда тохташдырыу механизмлери бла байламлы этгенди. Ишни жетишимли болгъаны уа аны авторуна профессор даражаны берилирлерине да себеплик этгенди.

Аны университетни илму школуну айныууна къошхан юлюшюн белгилерчады. 2003 жылдан башлап 2017 жылгъа дери диссертацияла советни алим секретары болуп, жууаплы ишни бардыра, илму кадрланы хазырлагъанды, аланы аттестациялаугъа къайгъыргъанды. Аны илму жетишимлери кенг халда къабыл этилип, белгили болгъандыла. 2010 жылдан бери Адыг халкъла аралы илму академияны академигиди, «Известия КБГУ» атлы, бирси илму журналланы эмда басмаланнган затланы редколлегияларыны келечисиди. Билим бериуге эмда илмугъа кёп жылланы ичинде къошхан юлюшю ючюн РФ-ни Илму эмда башламчылыкъла жаны бла федерал агентствосуну эмда КъМР-ни Жарыкъландырыу эмда илму министерствосуну Сыйлы грамоталары бла саугъаланнганды.

Профессорну башчылыгъында белгили окъуу юйледе, мектепледе эмда промышленность предприятиялада уруннган фахмулу устазла бла алимле юйреннгендиле. Аны илму-педагогика иши бла 450-ден аслам басмаланнган затлада шагъырейленирге боллукъду. Аланы санында уа сегиз патент, 10 окъуу пособие, 18 методикалы тинтиуле, 18 монография да бардыла. Монографияладан бири уа Нидерландыледе чыкъгъанды басмадан. 

Бюгюнлюкде профессор Тимур Борукаев илму эмда билим бериу иш бла тири кюрешиуюн андан ары бардырады. Аны илму сейирлери жангы полимерли къуралыуланы синтезлери, полимерли композит материалланы къурау бла байламлыдыла. Усталыкъ жаны бла жетишимлеринден сора да, ол ариу юйюр ёсдюргенди, тёрт сабийни атасыды.
КъМКъУ-ну коллективи Тимур Абдуловични юбилейи бла жюрекден алгъышлайды!