Терроризмден сакъланыу жаны бла жангы жорукъла

Республиканы Курортла эм туризм министерствосундан билдиргенлерине кёре, къонакъ юйлени эмда адамланы сыйындыргъан башха жерлени терроризмден къоруулау жаны бла жорукълагъа тюрлениуле кийирилгендиле.

Алгъадагъы законнга кёре, къонакъ юйле барысы да, ала къайсы къауумда болгъанларына къарамай, къыйын болумда полицияны чакъырырча кнопкала бла жалчытылыныргъа керек эдиле. 2025 жылны 3 сентябринде къабыл кёрюлген 1362-чи номерли бегимге тийишлиликде энди низам башхаракъды. Анга кёре къоркъуу чыгъарына биринчи-ючюнчю къауумдагъы къонакъ юйлени къыйын болумну юсюнден билдириулени РФ-ни Миллет гвардиясына ётдюрюрча амаллары болургъа тийишлидиле. Аланы гвардияны къорууланыууна алыргъа амал жокъ эсе, комиссияны оноуу бла билдириуле «112» номер бла экстренный службалагъа жиберилликдиле. Къоркъуу болуруна тёртюнчю къауумдагъы къонакъ юйледен билдириуле Миллет гвардияны ведомстводан тышында къоруулау бёлюмюне неда «112» номер бла экстренный службагъа ётдюрюллюкдюле.

Къоркъуу чыгъарына кёре къонакъ юйле къауумлагъа бу шартлагъа кёре юлешинедиле:

- биринчи къауумгъа террор чабыуул этилгенде, ачыгъанланы саны 1 мингден аслам боллукъла киредиле;

- экинчи къауумгъа – ачыгъанланы саны 200 – 1 минг боллукъла;

- ючюнчюге – ачыгъанланы саны 50-200 боллукъла;

- тёртюнчюге – ачыгъанланы саны 50 адамдан аз боллукъла.