Жангы амалланы хайырланадыла

Кёп болмай Регионнга оноу этиу арада КъМР-ни Саулукъ сакълау министерствосуну штатда болмагъан баш  специалисти – аллерголог-иммунолог, медицина илмуланы доктору, профессор, Аллергиягъа бакъгъан араны баш врачы   Мадина Шогенова бла тюзюнлей эфир  болгъанды. Ол медицина учрежденияны ишини юсюнден хапарлагъанды эм тынгылаучуланы  да аллергия,  иммунология бла байламлы сорууларына  жууапла  бергенди. Мадина Суфьяновна  тюрлю-тюрлю аллергия ауруулагъа диагностика, багъыу эм профилактика бардырыуну юсюнден  билдиргенди. Ол айтханнга кёре,  саулай Шимал- Кавказ федерал округда Нальчикден сора аллергия эм  иммунология жаны бла  ара жокъду.  Ол себепден анга  профильли аурууу бла ким болса да келирге, кесине бакъдырыргъа эркинди.

Бусагъатда стационарда диагностика бардырыуда кёп тюрлю, ол санда жангы амалланы хайырланадыла.  Аны бла бирге аллергиялары къыйнагъанла медицина  полислери бла   кюз артында бла къышда тестлени ётерге боллукъдула. Аллай амал саусузгъа жарарыкъ   дарманны айырыргъа да болушурукъду. 

​ -Аллергия кёп замманы ичинде къыйнаргъа болады эм бирси, аурууланы кезиуюндеча,  температуралары да кётюрюлмейди.  Болсада  тохтаусуз бурун суулары келсе, терк-терк чючкюрселе бютюнда жай кезиуде ол битимлени букъусуна болады. Аны себепли  экинчи сезоннга дери тёзмей, кюз артында (ноябрьде)  бизге келип,  аллергияларын  тинтирча иммунотерапияны ётерлерин эслерине салыргъа сюеме,- дейди  Мадина Суфьяновна.

Тюзюнлей бериуню кезиуюнде Мадина Шогенова тынгылаучула берген соруулагъа да тынгылы жууапла тапдыргъанды. Аланы асламысы  астма, тюрлю-тюрлю аллергия ауруула, багъылыргъа жарагъан дарманла  бла байламлы болгъандыла.

Специалист айтханнга кёре, аллергияны къорууларча бир тюрлю мадар этилмесе, ол уллу заран салыргъа боллукъду. Сёз ючюн, аллергиялы ринит эм конъюктивитлери болгъанланы 60 проценти артда  астмадан къыйналадыла. Аланы биринчи жауларына уа кенг жайылгъан эм кючлю аллергенледен бири  амброзия саналады. Ол,  адам биринчи жыл ауругъанда окъуна солууун тыяргъа боллукъду.

 
Аллергиягъа къажау турууну юсюнден айтханда,  къонакъ  эм биринчи медикаментоз фармакотерапия амалны,  адамны санындан уун кетируню, аллергияны къозгъагъан шартдан кенг турууну    сагъыннганды.  Аны бла бирге хауада битимлени букъулары азыракъ чачылырча  къыралны болушлугъу бла  административ халда мадар да этилирге жарагъанын эсгертгенди. 

​-Диагностикада, багъыуда эм профилактикада да жангы амалланы хайырланыуну юсюнден айтханда, бийик класслы сынамлы препаратланы себеплиги бла  эм къыйын  бронха астманы   атопиялы дерматитни (кёбюсюнде ол  сабийледе тюбейди) багъаргъа  жарайды.  Ал заманлада аллай ауруулагъа  бир тюрлю медицина болушлукъ этерча болмагъан эсе да, энди  сабий  алты жылындан башлап контрольгъа алынады,- дейди специалист.  

Ол айтханнга кёре, жылны узунунда тюрлю-тюрлю аллергияла къозгъалыргъа боллукъдула. Аны себепли адам саулугъуна сакъ  кёзден къараргъа юйренирге керекди. Аллергиягъа ишекли болгъан  арагъа  келип, тийишли анализле бераллыкъды. Алагъа кёре тийишли халда багъарча амал да этилликди. Хар замандача, уллу кёллюлюк игиликге келтирмеучюдю.