Батырлыгъы, кишилиги бла да аскерчи нёгерлерин кёллендиргенди

 2 август – Хауа-десант аскерлени кюню

Тамазов Тимур Мухамедович  энчи аскер операциягъа ол башланнган кюнден окъуна киришгенди. 2022 жылны жайында уа  «Шторм» бирикген отрядны командирине салыннган эди. Ол башчылыкъ этген къауум Херсон эмда Запорожье областьланы тийрелеринде къазауат этгенди. Тимур чынтты эр кишини, жигит аскерчини, Ата журтха кертичиликни бла сюймекликни юлгюсюн кёргюзтгенди, Россейни Жигитини алтын жулдузуна тийишли кёрюлгенди (ёлгенден сора).

Тимургъа эрттеден окъуна абадан болургъа тюшгенди: атасы ёлгенде, анга жаланда 15 жыл толгъан эди. Ала юч сабий болгъандыла, ол а – бек гитчелери. Ол Прохладна районну Къарагъач элинде туугъанды, анда орта школну бошагъанды. 2008 жылда  Россейни Сауутланнган кючлеринде къуллукъ этип башлагъанды, Рязаньда командирлени хазырлагъан Армияны генералы В.М.Маргелов атлы бийик хауа-десант училищеде окъугъанды. Аны бошагъандан сора жашны Псков областьха  76-чы гвардиялы десант-штурм Чернигов дивизиягъа жибередиле.

Анда ол парашют-десант взводну командири болуп къуллукъ этгенди, ызы бла парашют-десант ротаны башчысына салыннганды.  2015 жылда Россейни Сирияда аскер операциясына къатышханды, халкъла аралы террорист къауумлагъа къажау кюрешде жигитлиги ючюн бир ненча кере саугъаланнганды.

СВО башланнганда, Тимур Тамазов къазауат баргъан тийреге кесини ротасы бла кирген эди. Аны биргесине къуллукъ этген жашлагъа аскер башчыла  бек ышаннгандыла. Ол бёлюм игиледен бирине саналгъанды эмда бир заманда да мёхеллик этмегенди. Тимургъа къазауатны бек къыйын кесеги  ючюн жууаплы болгъан бронегруппаны ышаннгандыла.  Анда аны бёлюмю тузакъгъа тюшгенди, алай Тамазов андан къутулууну амалын табып, кёплени андан саулай чыгъаргъанды. Ол заманда Тимур  тенглерини бир къауумундан айырылгъанды, алай ол ачыу аны бютюн бек чыныкъдыргъанды.

Башында жазгъаныбызча, 2022 жылны жайында Тимур Тамазов «Шторм» отрядны командирине салынады. Ол тюрлю-тюрлю специалистледен къуралгъан аскер бёлюм болгъанды. Анда къуллукъ этгенлени араларында келишиулюк болуру артыкъда магъаналы эди. Тимур аланы бирикдиралгъанды.  Ал атламлары окъуна кёргюзтгендиле «Шторм» кесини атына кертичи болгъанын. Сёз ючюн, Херсон тийреледе биринчи  къазауатда окъуна душманны 15 чакълы бронемашинасы эмда 150 аскерчиси гунч этилген эдиле.

Августда Алексеевка элни азатлау жаны бла операция башланнганды. Душман къорууланыу ызны арт жанындан кирип,  командный пунктха чапханды, алай   бизни аскерчиле къаты къажау сюелип, анга артха туракъларгъа тюшгенди. Болсада командир, аны бла чекленмей, душманны ызындан болуп, ол  бегитилип тургъан жерни да къурутургъа деп, кесине аллай борч салгъанды. Тимур, ол тийрени энчилигин хайырланып, аскерчи тенглеринден айырылып, кеси аллына душманны пулемёту тургъан жерге сыпдырылып барып, алайгъа гранатала атып, тёгерекни отха алдыргъанды.  Гвардиялы капитан ол буйрукъну толтурууну энчи амалын тапханды, бек башы – башхала ючюн кесин аямагъанды. Хар аскерчи да алай болургъа керекди деп, алай къарагъанды.

Пулемётну гунч этгенден сора, Тамазов артха къайтып, сермешге башчылыкъ этиуню андан ары бардыргъанды. Алексеевканы россейли аскерчиле къолгъа этгендиле, алай хар элни бла шахарны азатлагъандан сора, бютюн уллу кезиу башланады: эркин этилген жерлени сакъларгъа эмда  аладан контратака этерге онгла къураргъа кереклиси.

Алай бла Алексеевканы тийресинде жангы командный пункт къуралады. Анга уа душманны жанындан от ачылмай къалмагъанды. Элден ВСУ-ну къалгъан кючлери къысталгъандан сора, украинлы командирле аны не да этип артха къайтарыргъа умут этгендиле да, ары уллу кюч бургъандыла.  Командный пунктха миномётладан аяусуз от ачылгъан кезиуде Тамазов жаралы болады, алай тёгерекде бола тургъан халны кёрюп, командирсиз аз заманнга окъуна къалыу уллу хатагъа келтирлигин ангылап, жеринде къалгъанды, сермешге башчылыкъ этгенди. Аны къой – артиллеристлеге топланы къалайгъа атаргъа керек болгъанларын окъуна билдирип тургъанды. Алай бла душманны алгъа ёшюн уруп кюрешиую тохтатылгъанды. Атышыу бошалып, хар зат шошайгъандан сора, Тимур эсин ташлайды.

Ол тийреледе къорууланыу ызны бизни аскерчилерибиз августну ахырындан сентябрьни ортасына да сакълагъандыла. «Шторм» отряддан жашларыбыз кишиликлери эмда батырлыкълары бла сейирге къалдыргъандыла. Ол къыйын кюнледе отрядха  магъаналы буйрукъланы толтурургъа – душманны аллын тыяргъа, анга чабыууллукъла этерге - кёп кере тюшгенди.

11 сентябрьде Тамазов  отряды бла бирге элни тёгерегинде сабанлагъа чыкъгъанды. Алагъа минала салыу бла кюрешгенлени сакъларгъа, мараучула ала берилген буйрукъну тынч толтурурча этерге тюшгенди. Костромка элни тийресинде буйрукъларын толтуруп, артха къайтып келе, алагъа къаты от ачылады. Алайда Тимур ауур жаралы болады, алай къатында аны нёгери да ауады. Аны кёрюп, ол, жарасы бек ачыгъанына, къаны тёгюлюп, къарыусуз бола баргъанына да къарамай, нёгерин кётюрюп, бир жанына элтеди. Алай анда  къатларында топ чачылады. Ючюнчю кере жаралы болгъандан сора гвардиялы капитан Тимур Тамазов эсин ташлайды. Аскерчи нёгерлери, аны окъла тюбюнден чыгъарып, аскер госпитальгъа ашырадыла. Анда уа жигит офицерни жашауу ючюн врачла бир ненча кюнню кюрешедиле, алай ёлюмден къутхаралмайдыла.

Тимурну ёлгени саулай дивизиягъа да уллу къоранч болгъанды. Ол «Кабарда» деген ат бла айтылгъанды, сермеш баргъан жерлеге келгенинде, солдатла бек кёлленнгендиле. Тимур Тамазов чынтты офицер, хунерли командир болгъанды, батырлыгъы, кишилиги бла да юлгю кёргюзтгенди.