Къыйын болум сакъланады

МЧС-ни регионда Баш управлениясындан билдиргенлерича, 1 августда Тырныауузда Гирхожан сууда ырхы келири сакъланмайды, алай Элбрус районда къыйын болум бла байламлы низам алгъыннгылай къалады.

«Гипсолит» заводну тёгереги бла жол бла жангызда Минги тауну тийресинден барыргъа эркин этиледи, полициячыла кюнню халына кёре жолда жюрюуню эсепде тутадыла. Ырхы ычхынып, жууукъдагъы юйлени суу барысына къоркъуу болгъаны ючюн 342 инсан, ол санда уа 96 сабий къоркъуусуз жерге кёчюрюлгендиле. Адамланы сыйындырырча юч жер хазырлыкъда турадыла: Тырныауузда «Баксан» къонакъ юй бла 1-чи лицей, Быллымда орта мектеп.

Ырхы Огъары эм Тёбен Гирхожан районлада суу быргъылагъа хата салгъаны ючюн, алада 3 минг адам суусуз къалгъандыла, газ бла электричество ызлагъа заран жетмегенди. Жууукъ заманда суу да келип башларча мадарла этиледиле, ары дери уа сууну юйлеге келтиредиле.

Шахарда экстренный службала барысы да, ала бирге уа МЧС-ни къутхарыучулары да ишлейдиле, хал тюзеле тебирегенлей, жол службала тазалау ишлени башларыкъдыла.