Бюджет жерлеге тюшгенлени тизмеси белгили боллукъду

Бусагъатда битеу абитуриентле документлерин  колледжлеге, вузлагъа берип бошагъандыла. Къабарты-Малкъар къырал университетни пресс-службасы билдиргенине кёре  биринчи – бешинчи августда  хар абитуриент бир окъуу юйде окъургъа ыразылыгъын  берирге керекди. Бийик баллары болгъанла  эки-юч  вузну тизмелерине тюшселе, аладан бирин сайларгъа керекди. Ызы бла экинчи-ючюнчю августда Къабарты-Малкъар къырал университет  целевой набор бла баргъанла, квотала бла хайырланнганла, олимпиадалада хорлагъанла  бюджет жерлеге  алыннганларыны приказын басмаларыкъды. Андан сора алтынчы – жетинчи августда бюджет жерлеге тюшгенлени приказы чыгъарыкъды.

Андан сора къалгъан жерлеге абитуриентле къошакъ халда алынырыкъдыла.  Бу иш онбиринчи августха дери барлыкъды. Сора,  онг болгъанына кёре, вакансияла болсала, окъуугъа кирирге боллукъду. Сёз ючюн, тизмеледе болгъанланы бир къаууму, оноуларын тюрлендирип, документлерин алыргъа боллукъдула. Толусунлай окъуугъа кириу жыйырма тогъузунчу августда бошаллыкъды.