Концертге къарагъандыла, кеслери да тепсегендиле

    Бу кюнледе Нальчикде Культура фондда  «Славян ингирле» деген къууанчлы тюбешиу болгъанды. Аны  республикада жашагъан белорусланы  «Сябры» маданият арасы  къурагъанды. Къонакъланы араларында уа тюрлю-тюрлю миллет биригиулени, ол санда  оруслуланы «Вече», эрменлилени «Ахбыу», эбзелени «Риони», украинлыланы «Днипро»  араларыны  башчылары, келечилери кёп эдиле.
      Ингир шуёхлукъгъа, бирликге жораланнган назму бла ачылгъанды. Андан сора  сейирлик тепсеуледен,  макъамладан, жырладан эмда назмуладан къуралгъан программа  кёргюзтюлгенди. Юч сагъатдан артыкъ заманны ичинде  «Арабеск» сабий  ансамбль  «Ариу къыш» деген  ат  бла тюрлю-тюрлю  тепсеулени,  «Всё могут короли!» деген  хореография  сахна оюнну, цыганлыланы тойларын, дагъыда кёп  аламат номерле кёргюзтюп къууандыргъандыла.
Концерт программагъа  абаданла да  уллу юлюш  къошхандыла. Марина Шашева жырлагъаны бла къалмай, къонакъланы ортагъа чыгъарып, бир бирлерини къолларындан тутдуруп  тепсетгенди. Татьяна Смолина бла Елена Антонова уа къыл къобуз  сокъгъанды, жырлагъан да этгенди.  «Колорит» жырчы къауумгъа да жыйылгъанла сюйюп тынгылагъандыла. Ингирде  малкъарлы, къабартылы, оруслу поэтлени назмулары да   эшитилгендиле.
     Къонакъланы  «Сябрыни», «Вечени», «Рионини», «Ахбыуну» таматалары Павел Сидарук ,Анатолий Канунников,  Анзор Лобжанидзе, Армен Погосян эм башхала алгъышлагъандыла. Республикабызда жашагъан кёп миллетлени  келечилери не заманда да бир бири къолларындан тутуп,  къарындашлача, эгечлеча  бирге тынч-ырахат жашау этерлерин тежегендиле.
       Ахырында уа кёп миллетлени келечилери, тёгерек столну артына олтуруп, татлы хантла бла чай ичгендиле, ушакъ этгендиле.