Сабийлеге – тынгылы майдан

Нальчикде Крылов атлы орамда, УФСИН-ни мекямыны къатында сабий майданны бла футбол ойнагъан жерни айбатландырлыкъдыла. Тапландырыу ишле шахарны администрациясы бардыргъан эришиуде 15-чи юйде жашагъанла хорлагъанларыны хайырларындан бардырыладыла. Алай бла битеу ишле грант ахчагъа толтуруллукъдула.

Эм башха сабийлени излемлери салыннгандыла.  Эски майданнга аланы къоркъуусуз ойнаргъа онг болмагъаны ючюн жиберирге жарамай эди, жангысында аллай къоркъуу боллукъ тюйюлдю. Энди уа ойнарча, майдандан сора да, гитче-футбол, баскетбол бла кюреширге онгла къураллыкъдыла, солурча шинтикле да боллукъдула, ингирде чыракъла жанарыкъдыла.

УФСИН-ни башчысыны орунбасары Тимур Шомахов билдиргенича, майдан федерал иеликге саналлыкъды. «Республикада ишчилеге эки юйюбюз барды, алада жыйырма алты юйюр жашайдыла. Ала, юйню жамауат самоуправлениясын къурап, эришиуге алай къатышхандыла», - дегенди ол.

Алай бла жангы майдан беш жюз къыркъ квадрат метр жерни аллыкъды. Къурулуш биригиуню башчысы Азрет Битоков айтханыча, ол айны ичинде хайырланыугъа берилликди, битеу излемлеге тийишли боллукъду. Бу жумушлагъа эки миллион сом чакълы бир ахча къоратыллыкъды.