Саулукъдан уллу байлыкъ жокъду. Аны ким да биледи, алай, жыл сайын санаторийледе кеслерине бакъдырып, аны кючлерге онглары болмагъанла, жарсыугъа, кёпдюле. Ма аны эсге алып, «Горный родник» махкемени оноучулары путёвкаланы багъаларын азыракъ этерине къайгъырадыла. Шёндю ала бир кюннге бир минг сомдан башлап эки минг бла жарым сомгъа жетедиле.
Бакъгъанлары, къарагъанлары да анга кёре болурла дерикле да чыгъарла, алай, биз анда тургъан кезиуде (18-21 кюн) кёргенден, солургъа келгенле бир тюрлю жаны бла апчырыкъ тюйюлдюле. Санаторий Долинск микрорайонну бек ариу жерлеринден биринде орналыпды. Аны тёгерегин агъач къуршалапды, жемиш тереклери да кёпдюле. Анда бир жолгъа 140 адамгъа солургъа онг барды. Ала тургъан отоула тап жарашдырылыпдыла. Машиналары бла келгенлеге да аланы салыр жерле хазырдыла.
- Бизде тургъанланы саулукъларын кючлендириуде гара сууланы, дарман балчыкъны, таза хауаны да хайырланабыз, - дейди учрежденияны баш врачыны орунбасары Татьяна Кебекова. – Жылы азот эмда гара суула - къыйматлы багъыу амалладан биридиле. Ала тамырланы кенгертирге болушадыла, жюрекге, жиклери, нервалары ауругъанлагъа бек жарайдыла. Ашны да ауругъанланы эсге алып алай жарашдырабыз эмда беребиз.
Дагъыда, баш врачны орунбасары айтханнга кёре, кислород бла байыкъландырыу, жемчужный ваннала, паранафт да саусузлагъа женгиллик бередиле. Щелочь ингаляцияла, дарман хансладан хазырланнган сууну тылпыуу бла солутуу, ийнеле салыу, лазер аппаратны хайырланыу эм башха тюрлю процедурала да иги болушханларын сынау кёргюзтгенди. Ала адамны солууун игилендиредиле, ашны эритирге, жюрекни кючлерге, къан тийишлисича жюрюрча этерге болушадыла, арыгъанын кетередиле, санларын тирилтедиле,тынчлыкълы жукъларча да этедиле.
Энди компьютерни хайырындан адамны аурууун терк да, тюз да тохташдырыргъа онг чыкъгъанды. Тишлеге къарарча эм башха багъыу амалла этерча кабинетлени да хар кереклери бардыла. Солугъанла бош заманларын тап ётдюрюрлерини къайгъысы да кёрюледи: бильярд, теннис ойнарча отоула, тренажёр зал, гара суу бла толтурулгъан бассейн бардыла. Аланы бир мекямда орналгъанларын келгенле бек жаратадыла.
Уллу болмагъан коллективни къайсы бири да къонакъларын ыразы этерге, кёллерин кётюрюрге итинедиле, ырахат солурларына сакъдыла. Ала ючюн деп тюрлю-тюрлю экскурсияла къураладыла. Ыразылыкълары болгъанла Чегем чучхурлагъа, Чирик кёлге, Минги тауну тийресине, Огъары Малкъаргъа, ол угъай да, Магасха бла Грозныйге да барып, айбат жерлерин кёредиле.
Мен Москвадан келген Надежда Саватеева бла да ушакъ этгенме. Ол мында солугъанлы онбеш кюн болады. «Бир ыйыкъдан юйюме къайтырыкъма, кетеригим а келмейди,-дейди ол.- Багъыу амалланы барысын да бек жаратханма, берген ашлары да тюз юйюдечады. Ишлеген адамлары уа бир жарыкъла, огъурлула. Хар эрттенликден паркга барып, гара сууланы тюрлюлеринден ичеме. Ол да аламатды.
Сизде багъала да учуздула. Былайдан узакъ бармай жюн базаргъа тюшюп, къызыма, киеуюме, туудугъума да таулу тиширыула эшген затладан саугъала алгъанма. Сёзсюз, кесими да унутмагъанма. Дагъыда Москвагъа таулу бишлакъ элтирге деп турама. Аныча татыулу зат алыкъа ашамагъанма. Адамларыгъыз да бир игиле, ышармай сёлешмейдиле. Маршрут таксиде бара, билмеген затынгы сорсанг, тынгылы ангылатырла, гитче уллугъа жер берген адет да алыкъа жюрюйдю сизде.
Бир кюн а кёп адам жыйылып тургъанын кёреме да, къатларына барып, нек сюелгенлерин сорама. Ала уа Шыкъыгъа, малкъар поэзияны мурдорун салгъан Мечиланы Кязимни юйюне, тебирегенлерин айтадыла, мени да чакъырадыла. Барама. Жашагъан ёмюрюмде кёп къыраллада, жерледе да болгъанма, алай андача тауушлукъгъа уа тюбемегенме. Кюнде жылтырагъан деменнгили къаяла, аланы араларында уа къушла уча. Ол тамашалыкъны кёргениме, жолоучу нёгерлерим бла танышханыма асыры къууаннгандан, кесими насыплыгъа санайма. Энди бери жыл сайын келиргеди муратым».
