Болжалгъа тийишлиликде бардырыладыла

Энди сабийле борчлу халда берилген сынауланы экисин да жазып бошагъандыла. Баш кюнде уа ЕГЭ-леге физиканы бла обществознанияны сайлагъанла баргъандыла. Ол кеси да Бир къырал экзаменлени мурдорлу кезиуюню тёртюнчю кюню эди.

Алгъадан да эслей келгенибизча, хар жылдан да обществознанияны сабийлени асламысы сайлайды. Ол болум а аны бийик окъуу юйлени кёбюсюнде суралгъаны бла байламлыды. Алайды да, быйыл аны республикада  2097 адам жазгъанды. Физиканы уа 577 сабий бергенди.

Саулай алып айтханда, регионда бу сынаула бла байламлы 17 пункт ишлегенди. Сёз ючюн, Нальчикни 33-чю номерли мектебинде къуралгъан аладан бириди. Мында жаш тёлю физиканы жазгъанды.

Саулай да къыралны алып айтханда уа, баш кюнде бу сынаулагъа 378 минг адам баргъанды эмда ол битеу регионлада болжалгъа тийишлиликде озгъанды. Аланы барысында да 4360 пункт къуралгъанды, 9000 жамауат къараучу  болгъанды. Аладан тышында да, сынауланы барыуларын 150 минг техника, башха жаны бла да специалист жалчытханды.

Энчи обществознанияны белгилесек, битеу да Россейде аны 272 минг сабий сайлагъанды. Физиканы жазарыкъларын а 105 минг адам билдирген эди.

Сынау берилгеннге саналлыкъ эм алаша баллны ёлчеми обществознаниядан – 42-ди, физикадан а ол бир кесек азыракъды-36 балл. Алай эсе да, хар заманда эсгертиле келгенича, бийик окъуу юйге кирир ючюн ала азлыкъ этерге боллукъдула. Андан сора да, алтын майдалгъа тийишли болур муратлары барлагъа уа сынауланы 70-ден аз баллагъа жазаргъа жарамайды. Алайсыз «алтын» бериллик тюйюлдю. Кеслерини эсеплерин а ЕГЭ-лени жазгъанла 18 июньдан кеч къалмай билликдиле, деп белгиленеди.

Айхай да, хар замандача, биз да сабийледен  быйыл да умутлубуз, аланы ахшы кёрюмдюлерин сакълайбыз. Былтыр физика бла байламлы барыбыз да къууанырча болгъан жумуш да эсибиздеди. Бир къырал сынаула къуралгъанлы бери да физикадан жаланда озгъан жылда алгъандыла регионубузда мектеплени бошагъанла  100 баллны биринчи кере. Аллай эсеп былтыр бир угъай, эки да болгъан эди. Къурманланы Хажи-Мурат (Нальчик, 18-чи  школ) бла Энейланы Магомет (Нальчик, 2-чи лицей) тийишли болгъан эдиле аллай бийик эсеплеге.

Энди уа ЕГЭ-леге сабийле орта  кюнде – 4-чю июньда – барлыкъдыла. Ол кюн а биология, география, тыш къыраллы тил (ингилиз, испан, къытай, немис, француз) дерслени сайлагъанла сынарыкъдыла кеслерини билимлерин. Тыш къырал тилледен бу жол «Жазыу» бёлюмю боллукъду, «Сёлешиу» кесеги уа болжалгъа тийишлиликде 10-11 июньда эки кюннге юлешинип бардырыллыкъды.

Обществознаниядан бла физикадан  къошакъ халда ЕГЭ 16 июньда боллукъду. Ол бирси жыллада мектеплени бошагъанлагъа къураллыкъды. Бу дерсден сынаугъа юч сагъат   бла жарым бёлюнеди. Физикадан берилген заман а андан беш минутха асламыракъды.