Урунууда – жигер, урушда – батыр

Уллу Хорламгъа-80 жыл

Гуртуланы Атлы  аскерчи жолун 115-чи атлы  дивизияны санында Донну бла Къалмукъну тюзлеринде башлагъанды. Ызы бла 8-чи гвардиялы мараучу  бригаданы къауумунда Малгобекни  бла  Эльхотовону тийрелеринде къазауатлагъа къатышханды. Новороссийск къатында да  къанлы сермешледе болгъанды.

1943 жылны кюзюнден башлап  1-чи Украин фронтда Бердичев, Тернополь эм башха шахарланы азатлаугъа къатышханды, 117-чи гвардиялы Бердичев мараучу дивизияда Польшаны бла Чехословакияны къоруулагъанды, Германияда душманны ууатханды.

Кюнлени биринде Гурту улу къуллукъ этген взвод агъач ичи бла бара болгъанды. Ингир ала аскерчиле агъачны къыйырында жангыз юйню эслеп, кече  анда къалыргъа келишгендиле. Алай, танг белги бере башлагъанлай, часовой, ротагъа душман жууукълаша тургъанын кёрюп, тынчайып тургъан аскерчилени къобаргъанды. Взвод адам саны бла кесинден иги да кёп душманнга от ачханды, автоматладан атдыра, жауну кёп солдатын агъызгъанды.

Атылгъан тауушланы эшитип, бирси аскерлерибиз алагъа болушлукъгъа ашыкъгъандыла, алай бла сау къалгъан немислилени жесирге алгъандыла. Бу сермешде кёргюзтген кишилиги эм батырлыгъы ючюн Гуртуланы Атлы Къызыл Жулдузну ордени бла саугъаланнганды.

1945 жылны майыны аллында Берлинни къатында Луккенвальдны бизни аскерле къолгъа эте туруп этген жигитлиги ючюн Атлыгъа Къызыл Жулдузну экинчи орденин да  бергендиле. Андан сора да, ол «За оборону Кавказа», «За взятие Берлина», «За освобождение Праги», «За победу над Германией» майдалла бла саугъаланнганды.

1945 жылны декабринде демобилизациядан сора Гурту улу  Орта Азияда миллетине къошулгъанды, халкъы бла бирге 1957 жылда туугъан жерине къайтханды. Мамыр жашауда урунуу къауумну таматасы, сют-товар ферманы башчысы болгъанды. Аскерчи саугъаларына уа иш кёллюлюгю ючюн «За освоение целинных земель», «За трудовое отличие», «За трудовую доблесть» майдалла да къошулгъандыла.