«Эсгериуню терек бахчасы» акциягъа къошулгъандыла

Республиканы саулукъ сакълау учреждениялары «Эсгериуню терек бахчасы» акциягъа къошулгъандыла. Аны чегинде Саулукъ сакълау министерствону медико-хирургия арасында жыйырма терек орнатылгъанды.

Эм алгъа медикле эсгериу жыйылыугъа къатышхандыла – ара «Ёмюрлюк от» ачылгъанды. Былайда врачла, энчи аскер операцияны ветеранлары, къонакъла да Уллу Ата журт урушда ёлгенлени эсгергендиле. Тереклени орнатыугъа саулукъ сакълау министр Рустам Калибатов да къатышханды. «Бюгюн быллай ишле онбеш медицина учрежденияда бардырыладыла, сайлаугъа тийрелеринде терек салырча жерле болгъанла тюшгендиле. Бу жумушха сыйлы къонакъла да чакъырылгъандыла», - дегенди ол.

Сыйлы къонакъла уа энчи аскер операцияда болгъанладыла, ол санда мында реабилитацияны ётгенле да. Энди былайы алагъа энчи магъананы тутарыкъды, нек дегенде бу аллея жигитлени барысына да аталгъанды. 

Дондагъы Ростовда Хауа-десант аскерлеге себеплик этиу фондну правленини башчысы Сергей Ичетовкин эс бургъаныча, аскерчилени араларында ауур жаралыла, саулукъларына, санларына уллу хата тийгенле да бардыла. Алай ала кёлсюзлюк этмейдиле, халлары игиге айлана тебирегенин да белгилерге керекди. Реабилитацияны мында ёте, ала сау болургъа онг тапхандыла, дейди ол.

«Эсгериуню терек бахчасы» акция битеу къыралда бардырылады, анга кёре Уллу Ата журт урушда ёлгенлени хурметлерине жыйырма жети миллион терек орнатыргъа белгиленеди.