Ёмюрлюк от энди ёчюлтюллюк тюйюлдю

«Единая Россияны» эм «Газпромну» болушлугъу бла Къабарты-Малкъарда Ёмюрлюк от жандырылгъанды. Республика «Хорламны отун сакълайбыз» битеуроссей акциягъа къошулгъанды.

Зольское элде Уллу Ата журт урушну жигитлерини эсгертмесине Ёмюрлюк отну жилтини аскер махтаулукъну шахары Нальчикден келтирилгенди, деп билдирилгенди  KABARDIN-BALKAR.ER.RU сайтда. Былайда къарындаш къабырда къазауатда жан берген аскерчиле бла эллиле бирге басдырылыпдыла.

Эсгертмени ачылыууна аталгъан жыйылыугъа эллиле, энчи аскер операцияны ветеранлары, юнармиячыла, волонтёрла, жамауат организацияланы келечилери къатышхандыла.

Жыйылыуну ача, КъМР-ни Парламентинде партияны фракциясыны таматасы Михаил Афашагов эсгертмеде жандырылгъан от къазауатда Хорлам келтирген аскерчилеге этилген хурметни белгиси болгъанын чертгенди. «Ала дунияны ёлюмден сакълагъандыла, бу жигитлик жюреклерибизде ёмюрлеге къаллыкъды»,-дегенди ол.

Жыйылыуда «Газпром межрегионгаз Нальчик» обществону башчысы Залим Вороков да сёлешгенди.

Алгъын былайда эсгертмеде от жаланда байрам кюнледе жандырылгъанды. Алай ол ахырда ёчюлмез ючюн эсгертмеге газ ыз тартылгъанды, дагъыда жулдуз ишлетилгенди.

  Партияны регион бёлюмюню толтуруу комитетини башчысы, «Тарых эсде тутуу» партия проектни регионда толтуруугъа жууаплы Дмитрий Парафилов «Единая Россияны» Ёмюрлюк отланы газ бла хакъсыз жалчытыу башламчылыкъ тарыхны сакълауда, ёсюп келген тёлюню Туугъан журтха сюймекликге юйретиуде артыкъда магъаналы болгъанын чертгенди.

- Хорламны 80-жыллыгъын белгилеген жылда  ол бютюнда багъалыды.  Фашизмни хорлагъан ата-бабаларыбызны жигитликлери бла ёхтемленебиз. Ол къазауатны юсюнден керти хапарны тёлюлеге сакъларгъа борчлубуз,-дегенди ол.

Эсигизге салайыкъ, 2022 жылда Россейни Президенти Владимир Путин Ёмюрлюк отлагъа газны хакъсыз бериуню юсюнден законну къабыл кёргенди, ол «Единая Россияны» башламчылыгъы бла жарашдырылгъанды. Уллу Хорламны 80-жыллыгъын белгилеуню чеклеринде партия «Газпром» бла бирге «Хорламны отун сакълайбыз» акцияны башлагъанды. Къыралда  газ 120 эсгертмеге тартыллыгъы белгиленеди. Битеу жумушланы 9 майны аллында бошаргъа мурат барды.  Ол кюн къыралны регионларында 80 эсгертмеде Ёмюрлюк отланы бирге жандырыргъа белгиленеди.