Суратлары жарыкъ умутладан толудула

КъМР-ни Миллет музейинде быйыл бешинчи кере «Жауунну адамы» деген кёрмюч ачылгъанды. Ол Аутизмни юсюнден информацияны жайыуну битеудуния кюнюне  аталгъан ишледен бек магъаналысы эди. Бюгюнлюкде  аутизм диагнозлары болгъан сабийлени жамауатха къошар ючюн, тынгылы билим бериу жаны бла кёп зат этиледи. Битеу къыраллада сынау кёргюзтгенди: атала-анала, врачла, жууукъла-тенгле бирлешселе, бу сабийлени бийик жетишимлери болады. Анга шагъатлыкъ - Миллет музейде кёрмюч.

«Жауунну адамы» деген белгили фильмде аутист къалай жашагъаны кёргюзтюледи. Бизни республикада уа аутист  фахмулу жаш Амир Ивазовну  бир кёрмючге «Жауунну адамы»  деген сураты кёплени сейирсиндирген эди. Андан сора Къабарты-Малкъарда  фестивальны аты «Жауунну адамы» болгъанды. 

КъМР-ни маданият министри Мухадин Кумахов: «Бу суратлада ариулукъдан, жарыкъ умутладан  сора мудахлыкъ да эсленеди. Мени акъылыма кёре, хар адам бир жумушну тамамларгъа жаратылады. Бу сабийле бизни жашауну сюерге юйретедиле. Башха жылладача, Миллет музей бир къауум ишни сатып аллыкъды», - дегенди. 

Кёрмючде белгили суратчы Руслан Цримов «Заман» газетге интервьюсунда былай айтханды: «Битеу сабийле да суратчыладыла, алай адам уллая барса, дуниягъа кесини энчи къарамын сакълаялмайды, анда суратчы ёледи. Бир-бирде колледжде, академияда окъугъанында устаз айтханны этеме деп, адам кесин, энчи хатын  тас этеди. Биреуге ушаш сурат этсенг, ол чыгъармачылыкъ бла байламлы тюйюлдю. Искусство – ол  жангы затды. Жангы къарам. Бу кёрмючде Амир

Ивазовну жети- сегиз иши бек аламатладыла. Къарагъыз, сурахай къызчыкъны бурунун уппа этгенди да, аны буруну сурахайны терисича сепгил болуп къалгъанды! Амир биз бир бирибизде къойгъан ызланы юсюнден лакъырда халда айтады суратында! Ультрамарин тюбикден чыкъгъан паста уа тенгиз болуп къалады! Бек сейирлик суратла бардыла бу кёрмючде». 

Амир Ивазовну анасы Рената Сохова: «Мен кёп кере кёлсюзлюк этгенме, алай мени кёллендирген, кюч-къарыу берген  профессор Теммоланы Лейла болгъанды. «Тохтаргъа жарамайды», - дегенлей тургъанды манга. Сау болсун. Бусагъатда Амир КъМКъУ-ну дизайн колледжинде окъуйду, мен а кесим къурагъан «Индиго» коррекция арада башха сабийлеге, аланы аталарына-аналарына болушургъа кюрешеме. Бу кёрмючде хар сатылгъан суратдан тюшген ахча аутист сабийлери болгъан къолайсыз юйюрлеге берилликди», - дегенди. Рената Сохова бла Теммоланы Лейла фестивальны къурагъанладан эм спонсорладан бирлеридиле. 

Профессор Теммоланы Лейла: «Аутизм  жер башында бир адам да болушмазча къыйынлыкъ тюйюлдю. Мен сабийлерин айнытыр ючюн кючлерин аямагъан аналаны алларында баш урама», - дегенди. 

Быйыл кёрмючде къыркъ жети сурат бар эди, биринчи кере беш жыл мындан алгъа  къуралгъанда уа - онеки. 

КъМР-ни билим бериу министрини орунбасары Мокъаланы Ачемез сабийлени айнытыуда жаланда къырал этген бла чекленмей, жамауат ишчиле кеслери кёп затла къурагъаны аламатды, дегенди. «Рената Сохованы юлгюсю кёллендиреди.

Башха атала-анала да аны ызындан барадыла. Сабийни фахмусуна ийнаныу ёчюлмезге керекди», - дегенди Мокъаланы Ачемез. 

Сабийлеге алгъышла айтханла кёп эдиле: КъМР-ни Парламентини депутатлары Текуланы Амырбий, Хусейн Эркенов, Валерий Ажиев, Руслан Мазлоев, «Нюр» журналны баш редактору Сабанчыланы Арипа, суратчы Геннадий Темирканов, КъМКъУ-ну инклюзия билим бериуню таматасы Ностуланы Людмила.

Бу огъурлу ишни ахырында уллула, гитчеле да жюз кёк шарны кёкге жибергендиле. Кёк шарла  аутистлени белгилериди. Андан сора да, хар кёрмючге келген шемшияны суратлагъанды, къатында къол салып, хар бирибиз жамауатны бирлигине къол кётюргенлей!