Миллет эсни айнытыр муратда

Мечиланы Кязим атлы маданият фондда  Малкъар халкъны жангырыу  кюню  белгиленнгенди. Ары келгенле да бу кюннге, хар замандача, иги хазырланнганлары аллындан окъуна билиннгенди. Миллет кийимледе ариу къызчыкъла, жигит жашчыкъла къарамынгы къууандыргъандыла. Экранда «Жаша, ёхтем Малкъарым!» деген жазыу кёрюннгенлей тургъанды. Залны къабыргъалары миллет кийизле бла жасалгъанлары да мекямгъа жылыулукъ бергенди.

Къууанчлы жыйылыуну Малкъарланы-Элеккуланы Карина бла Уяналаны Керим бардыргъандыла. Ала экиси да кезиу-кезиу сахнадан малкъар халкъны тарыхындан хапар айтхандыла, тышында махтаугъа тийишли болгъан жерлешлерибизни, башха айтхылыкъ адамларыбызны да эсгергендиле.

Концерт программаны Жашууланы Алёна «Турнала» деген жыр бла башлагъанды.  Жыр айтып къууандыргъанла дагъыда болгъандыла: Трамланы Самира «Таулула», Креатив студияда Гузийланы Женнетни сохтасы тырныауузчу Садыков Тамерлан «Мариям», Апполаны Амина «Аначыгъым», Газаланы Исмайыл «Жаз башында терекле», Кужонланы Амалия «Чыгъама жолума», Отарланы Омар а «Минги тау» деген жырланы айтхандыла.

Андан сора малкъар поэтлени назмуларын Улбашланы Джалила, Элмурзаланы Мариям бла Айдана, Габаланы Омар эм башхала айтхандыла.

Тепсеу бла уа Анахаланы Мурат бла Шогенова Олеся хазырлап, «Эдельвейс» атлы сабий тепсеу ансамбль кётюргенди ары келгенлени кёллерин. Гитарада аламат согъуп, яникойчу Газаланы Исмайил музыкагъа фахмусун туура этгенди.

Сабийлеге саугъаланы – Кязимни «Иги сёз» атлы китабын бла махтау къагъытланы – Кязимни туудугъу Мечиланы Таука, «Минги-Тау» тау журналны баш редактору Додуланы Аскер, «Заман» газетни бёлюмюню редактору Османланы Хыйса, назмучула Мусукаланы Сакинат бла Этезланы Ануар бергендиле. Ала бу байрамны, быллай башха ишлени къурагъан устазлагъа, ата-аналагъа, фондчулагъа, бютюнда бек фахмулу, жарыкъ сабийлеге ыразылыкъ сёзлерин айтхандыла.

Мечиланы Кязим атлы маданият фондда ишлегенле быллай байрамла, фестивальла,  эришиуле бла ёсе келген тёлюню миллет эсин айнытадыла, халкъыбызны, иги адамларыбызны, республикабызны, уллу Ата журтубуз Россейни да сюерге юйретедиле, таулу, башха миллетли сабийлени да маданиятыбыз бла, санатыбыз бла къысха шагъырей этедиле.    

Къабыргъадан бу къууанчха къарап, огъурлу бетинден нюр тёгюле ышара эди акъылман Кязим.